Qazaxıstanın Nəqliyyat Nazirliyi 2024-cü ildə Aktau hava limanı yaxınlığında “Azərbaycan Hava Yolları”na (AZAL) məxsus təyyarənin qəzaya uğraması ilə bağlı araşdırmanın davam etdirildiyini açıqlayıb.
Qanuntv.az xəbər verir ki, bu barədə TASS agentliyinə Qazaxıstan Nəqliyyat Nazirliyindən məlumat verilib.
Nazirlik bildirib ki, istintaq beynəlxalq mülki aviasiya qaydalarına uyğun şəkildə aparılır və yekun nəticələr hazır olduqdan sonra ictimaiyyətə rəsmi hesabat təqdim ediləcək.
Açıqlamada qeyd olunub ki, hazırda “Embraer 190 4K-AZ65” hava gəmisinin qəzaya uğraması ilə bağlı komissiya işini davam etdirir və bütün araşdırmalar Beynəlxalq Mülki Aviasiya Konvensiyasının standartlarına əsasən aparılır.
Yekun hesabatda qəzanın səbəbləri, nəticələr və müvafiq tövsiyələr yer alacaq.
Xatırladaq ki, 2024-cü il dekabrın 25-də Bakıdan Qroznıya uçan AZAL təyyarəsi Aktau yaxınlığında qəzaya uğramışdı. Təyyarədə 67 nəfər olub, onlardan 29 nəfər sağ qalıb. Hadisədən sonra qara qutuların analizi aparılıb və ilkin hesabat 2025-ci ilin fevralında açıqlanıb.
