Azərbaycanın qədim və ayrılmaz parçası olan Naxçıvan tarix boyu ölkəmizin siyasi, iqtisadi və mədəni həyatında mühüm rol oynayıb. Bu qədim diyarın taleyi və inkişafı hər zaman dövlətçilik tariximizin mühüm səhifələri ilə sıx bağlı olub.
Milli Məclisin deputatı Səbinə Salmanova Prezident İlham Əliyevin Naxçıvana səfərini şərh edərkən bildirib ki, ulu öndər Heydər Əliyevin Naxçıvana göstərdiyi xüsusi diqqət və qayğı Prezident İlham Əliyev tərəfindən müasir dövrün tələblərinə uyğun şəkildə ardıcıl və məqsədyönlü siyasətlə davam etdirilir.
Qanuntv.az xəbər verir ki, deputatın sözlərinə görə, Naxçıvan Azərbaycanın ərazi bütövlüyünün, milli dövlətçilik iradəsinin və geosiyasi maraqlarının mühüm dayaqlarından biridir.
S.Salmanova qeyd edib ki, Prezident İlham Əliyevin Naxçıvana hər səfəri dövlət siyasətinin konkret istiqamətlərinin müəyyənləşdirilməsi, mühüm layihələrin reallaşdırılması və muxtar respublikanın gələcək inkişaf perspektivlərinin müəyyən edilməsi baxımından xüsusi əhəmiyyət daşıyır.
Deputat bildirib ki, dövlət başçısı Naxçıvanın sosial-iqtisadi inkişafını və Azərbaycanın ümumi inkişaf sisteminə inteqrasiyasını daim diqqətdə saxlayır. Onun sözlərinə görə, Prezident İlham Əliyev indiyədək Naxçıvan Muxtar Respublikasına 17 dəfə səfər edib və bu səfərlər çərçivəsində çoxsaylı sosial, iqtisadi və infrastruktur layihələrinin açılışında iştirak edib.
Səbinə Salmanova Naxçıvanın müasir inkişaf tarixindən danışarkən ulu öndər Heydər Əliyevin siyasi fəaliyyətinin xüsusi əhəmiyyət daşıdığını vurğulayıb. Deputatın sözlərinə görə, ümummilli liderin Naxçıvan dövründə dövlətçilik ənənələrinin qorunması, milli iradənin möhkəmləndirilməsi və Azərbaycanın müstəqillik yolunun müəyyənləşdirilməsi istiqamətində mühüm addımlar atılıb.
O bildirib ki, sonrakı mərhələdə bu siyasi irs Prezident İlham Əliyev tərəfindən yeni məzmunla zənginləşdirilib. Naxçıvanda yol-nəqliyyat infrastrukturunun yenilənməsi, enerji, təhsil, səhiyyə və sosial müdafiə sahələrində həyata keçirilən layihələr muxtar respublikanın simasını əhəmiyyətli dərəcədə dəyişib.
Deputat qeyd edib ki, uzun illər Ermənistanın yaratdığı blokada şəraitində yaşayan Naxçıvanın inkişafının təmin edilməsi Azərbaycan dövlətinin siyasi iradəsinin və iqtisadi imkanlarının göstəricisidir.
S.Salmanovanın sözlərinə görə, Azərbaycanın 44 günlük Vətən müharibəsində qazandığı tarixi Zəfər və 2023-cü ilin sentyabrında ərazi bütövlüyünün və suverenliyinin tam bərpası Cənubi Qafqazda yeni reallıqlar yaradıb.
“Bu reallıqlar Naxçıvanın qarşısında da tamamilə yeni imkanlar açır. Azərbaycanın hərbi-siyasi Zəfəri yalnız ərazi bütövlüyümüzün bərpasını təmin etmədi, eyni zamanda regionun geosiyasi və geoiqtisadi mənzərəsini dəyişdirdi”, – deyə deputat bildirib.
O vurğulayıb ki, müasir dünyada nəqliyyat dəhlizləri yalnız yük və sərnişin daşımaları üçün istifadə olunan yollar deyil, eyni zamanda dövlətlərin iqtisadi potensialını, siyasi çəkisini və regional inteqrasiya imkanlarını artıran strateji vasitələrdir.
Deputat TRIPP layihəsinin də bu baxımdan xüsusi əhəmiyyət daşıdığını bildirib. Onun sözlərinə görə, regionda nəqliyyat və kommunikasiya əlaqələrinin bərpası Azərbaycanın əsas hissəsi ilə Naxçıvan arasında fasiləsiz nəqliyyat bağlantısının yaradılmasına geniş imkanlar açır.
S.Salmanova qeyd edib ki, bu bağlantının Şərq-Qərb və Şimal-Cənub nəqliyyat dəhlizləri ilə uzlaşdırılması Naxçıvanın regional və beynəlxalq tranzit sistemində rolunu daha da artıracaq.
“Beləliklə, Azərbaycanın əsas hissəsi ilə Naxçıvan arasında nəqliyyat bağlantısının yaradılması təkcə ölkəmizin daxili nəqliyyat imkanlarının genişləndirilməsi demək deyil. Bu, eyni zamanda Türkiyə, İran, Mərkəzi Asiya, Cənubi Qafqaz və Avropa arasında yeni iqtisadi əlaqələrin qurulması üçün mühüm platformadır”, – deyə parlamentari vurğulayıb.
Deputat Naxçıvanın Türkiyə və İranla sərhəddə yerləşməsinin ona böyük strateji üstünlüklər qazandırdığını bildirib. Onun sözlərinə görə, yeni dəmir yollarının, avtomobil yollarının, logistika mərkəzlərinin, gömrük infrastrukturunun və sənaye müəssisələrinin yaradılması muxtar respublikanın iqtisadi potensialını daha da yüksəldə bilər.
S.Salmanova Naxçıvanın Mərkəzi Asiya ilə Avropa arasında formalaşan yeni bağlantılarda rolunun artacağını da diqqətə çatdırıb. O qeyd edib ki, Şərqdən Qərbə uzanan nəqliyyat marşrutlarının gücləndirilməsi Azərbaycanın tranzit imkanlarını genişləndirərək ölkəni Avrasiya məkanında mühüm logistika mərkəzlərindən birinə çevirə bilər.
Deputatın fikrincə, nəqliyyat və logistika ilə yanaşı, Naxçıvanda yeni sənaye müəssisələrinin, istehsal klasterlərinin, xidmət sahələrinin və ixracyönümlü iqtisadi fəaliyyətin inkişafı üçün də geniş imkanlar yaranacaq.
S.Salmanova Azərbaycanın hərbi-siyasi qələbələrinin davamlı sülhə və iqtisadi inkişafa çevrilməsinin dövlət siyasətinin əsas istiqamətlərindən biri olduğunu vurğulayıb.
“Prezident İlham Əliyev həm müharibəni, həm sülhü qazandı” fikrinin bu reallığı ifadə etdiyini deyən deputat bildirib ki, döyüş meydanında əldə olunan Zəfər Azərbaycanın ərazi bütövlüyünü və suverenliyini bərpa edib, diplomatik müstəvidə formalaşan yeni reallıqlar isə regionda kommunikasiyaların açılması və iqtisadi əməkdaşlığın genişləndirilməsi üçün zəmin yaradıb.
Deputat Naxçıvanın gələcək inkişafının Azərbaycanın ümumi iqtisadi və nəqliyyat strategiyasının ayrılmaz hissəsi olduğunu qeyd edib.
Onun sözlərinə görə, Naxçıvan artıq kənarda qalan coğrafi məkan deyil. Əksinə, muxtar respublika Cənubi Qafqazın yeni nəqliyyat-kommunikasiya xəritəsinin əsas elementlərindən birinə çevrilməkdədir.
“Türkiyə ilə Azərbaycanın birbaşa bağlantısının güclənməsi, İranla əməkdaşlığın genişlənməsi, Ermənistanla sülh şəraitində kommunikasiyaların bərpası və Şərq-Qərb marşrutlarının inkişafı Naxçıvanın strateji əhəmiyyətini daha da artıracaq”, – deyə S.Salmanova bildirib.
Deputat hesab edir ki, bu proses Azərbaycanın regional mövqeyinin möhkəmlənməsinə, Cənubi Qafqazda davamlı sülh və əməkdaşlıq mühitinin formalaşmasına, eləcə də Avrasiya məkanında yeni ticarət marşrutlarının inkişafına mühüm töhfə verəcək.
Sonda Səbinə Salmanova vurğulayıb ki, ulu öndər Heydər Əliyevin siyasi irsi üzərində formalaşan və Prezident İlham Əliyevin siyasəti ilə yeni məzmun qazanan Naxçıvan strategiyası artıq yeni mərhələyə daxil olur.
“Dünən blokadanın yaratdığı məhdudiyyətlərlə mübarizə aparan Naxçıvan sabah regionun mühüm iqtisadi və logistika mərkəzlərindən birinə çevrilmək perspektivi qazanır. Bu gün Naxçıvan üçün yeni era başlayır. Bu eranın əsasını isə milli iradə, siyasi sabitlik, Zəfərdən doğan yeni reallıqlar və Prezident İlham Əliyevin uzaqgörən inkişaf strategiyası təşkil edir”, – deyə deputat əlavə edib.
