Azərbaycan Respublikasının Baş Prokurorluğunda konstitusiya quruluşunun zorla dəyişdirilməsinə, ərazi bütövlüyünün parçalanmasına, milli nifrət və düşmənçiliyin salınmasına, həmçinin terrorçuluğa açıq çağırışlarla bağlı başlanmış cinayət işi üzrə ibtidai istintaq davam etdirilir.
Baş Prokurorluğun mətbuat xidmətinin məlumatına görə, istintaq zamanı Rusiya Federasiyasının vətəndaşları – “Moskva 24” telekanalının aparıcısı və jurnalist İvan Knyazev, siyasi məsləhətçi və media eksperti Semyon Uralov, televiziya jurnalisti və müxbir, Rusiya Federasiyası nəqliyyat nazirinin müşaviri Aleksey Çadayev barəsində əsaslı şübhələr müəyyən edilib.
Müəyyən olunub ki, həmin şəxslər 14 iyul 2026-cı ildə “YouTube” platformasında “Семён Уралов” adlı kanalda yayımlanan verilişdə Azərbaycan Respublikasına qarşı zorakı üsulların tətbiqinə, konstitusiya quruluşunun zorla dəyişdirilməsinə, ərazi bütövlüyünün parçalanmasına, habelə milli nifrət və düşmənçiliyin salınmasına yönələn çağırışlarla çıxış ediblər.
Bundan əlavə, avqustun 13-də yayımlanan verilişdə Azərbaycan Respublikasına qarşı zorakı üsullardan istifadə edilməsinə, ayrı-ayrı şəxslərin fiziki məhvetmə təhlükəsi altında saxlanılmasına və ünvanlı şəkildə sıradan çıxarılmasına dair fikirlər səsləndirilib. Baş Prokurorluq bunu terrorçuluğa açıq çağırışlar kimi qiymətləndirib.
Faktla bağlı Azərbaycan Respublikasının Baş prokuroru tərəfindən Cinayət Məcəlləsinin 214-2-ci, 281.2-ci və 283.2.1-ci maddələri ilə cinayət işi başlanıb. İbtidai istintaqın aparılması Baş Prokurorluğun İstintaq idarəsinə həvalə olunub.
Toplanmış sübutlar əsasında Semyon Uralov, İvan Knyazev və Aleksey Çadayev qeyd olunan maddələrlə təqsirləndirilən şəxs qismində cəlb ediliblər.
Həmin şəxslərin Azərbaycan hüdudlarından kənarda olduqları nəzərə alınaraq barələrində axtarış elan edilib və məhkəmənin qərarları ilə həbs qətimkan tədbiri seçilib.
Onların tərəfdaş dövlətlərin ərazilərində müəyyən edilərək tutulması və Azərbaycana təhvil verilməsi məqsədilə aidiyyəti dövlət qurumlarına müraciətlər edilib. Eyni zamanda, təqsirləndirilən şəxslərin İnterpol kanalları vasitəsilə beynəlxalq axtarışının təşkili istiqamətində zəruri tədbirlər görülüb.
Baş Prokurorluq bildirib ki, Azərbaycanın suverenliyinə, konstitusiya quruluşuna və ərazi bütövlüyünə qarşı yönəlmiş qanunsuz əməllərə qarşı hüquqi tədbirlər bundan sonra da davam etdiriləcək.
Qanuntv.az
