Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva yanvarın 29-da İsveçrənin Qland şəhərində Beynəlxalq Təbiəti Mühafizə Birliyinin (IUCN) baş direktoru Qretel Agilar ilə görüş keçirib.
QanunTv.az “Report”a istinadən xəbər verir ki, görüş zamanı Azərbaycan və regionda ətraf mühitin mühafizəsi sahəsində mövcud çağırışlar, bu istiqamətdə beynəlxalq əməkdaşlığın rolu, qlobal və regional səviyyədə əlaqələndirilmiş yanaşmaların əhəmiyyəti, eləcə də ekoloji dialoqun möhkəmləndirilməsi perspektivləri ətrafında geniş fikir mübadiləsi aparılıb.
Bildirilib ki, 2014-cü ildən etibarən IUCN-in tamhüquqlu üzvü olan IDEA İctimai Birliyi təbiətin mühafizəsi və biomüxtəlifliyin qorunması sahəsində beynəlxalq təşəbbüslərdə fəal iştirak edir və əməkdaşlığın genişləndirilməsinə töhfə verir. Görüşdə IUCN-in ötən il Əbu-Dabidə keçirilmiş Ümumdünya Mühafizə Konqresi çərçivəsində təqdim olunan birgə pavilyon və digər uğurlu layihələr də xatırladılıb, əldə olunan müsbət təcrübə yüksək qiymətləndirilib.
Eyni zamanda, görüş çərçivəsində Azərbaycanda IUCN ilə yüksəksəviyyəli regional dialoqun təşkili, beynəlxalq tədbirlərdə birgə iştirak, o cümlədən Dünya Şəhərsalma Forumu (WUF13), Ümumdünya Ətraf Mühit Günü və COP31 çərçivəsində əməkdaşlıq imkanları müzakirə olunub.
Görüşün yekununda IUCN-in Azərbaycanda ölkə ofisinin açılması istiqamətində fəaliyyətləri, eləcə də tərəfdaşlığın daha da genişləndirilməsini nəzərdə tutan Niyyət Bəyannaməsi imzalanıb. Tərəflər bu addımı IDEA İctimai Birliyi ilə IUCN arasında uzunmüddətli və çoxtərəfli əməkdaşlığın inkişafı baxımından mühüm mərhələ kimi qiymətləndiriblər.
Qeyd edək ki, 1948-ci ildə təsis edilən IUCN ətraf mühitin mühafizəsi, biomüxtəlifliyin qorunması və dayanıqlı inkişaf sahəsində dünyanın aparıcı beynəlxalq təşkilatlarından biridir. Təşkilat 1964-cü ildə nəsli kəsilmək təhlükəsi altında olan canlı və bitki növlərini əks etdirən Qırmızı Kitabı yaradaraq qlobal ekoloji qiymətləndirmə və qərarvermə proseslərinə mühüm töhfə verib.
