Azərbaycan Respublikasının Prezidenti İlham Əliyev iyulun 11-də Şuşa şəhərində tarix-memarlıq abidəsi olan "Sadıqcanın evi"nin bərpadan sonra açılış mərasimində iştirak edib.
Qanuntv.az xəbər verir ki, Şuşa rayonunda Azərbaycan Respublikası Prezidentinin xüsusi nümayəndəsi Aydın Kərimov dövlət başçısına görülən bərpa işləri barədə ətraflı məlumat verib.
Bildirilib ki, Şuşa şəhərinin işğalı dövründə bina uzun müddət baxımsız qaldığından ciddi dağıntılara məruz qalıb. Tikilinin dam örtüyü, döşəmələri və daş hörgülərində aşınmalar yaranıb, memarlıq elementlərinin bir hissəsi zədələnib, mühəndis-kommunikasiya sistemləri isə tam yararsız vəziyyətə düşüb.
Azərbaycan Prezidenti İlham Əliyevin 2022-ci ildə imzaladığı Sərəncama əsasən, görkəmli Azərbaycan tarzəni, bəstəkarı və tar alətinin təkmilləşdirilməsində mühüm xidmətləri olan Mirzə Əsəd oğlu Sadıqın - Sadıqcanın yaşadığı evin layihələndirilməsi və bərpası məqsədilə müvafiq vəsait ayrılıb.
Qeyd edək ki, Prezident İlham Əliyev və birinci xanım Mehriban Əliyeva 2022-ci ildə Şuşaya səfərləri zamanı bu tarixi məkanla tanış olublar. Sonrakı mərhələdə bərpa konsepsiyası hazırlanıb və 2024-cü ildə tikilidə genişmiqyaslı bərpa işlərinə start verilib.
Zirzəmi və iki mərtəbədən ibarət olan ev-muzeyi Şuşa şəhərinin Sadıqcan küçəsində yerləşir. Binanın sivri tağlı pəncərələri, iri daşlarla işlənmiş giriş hissəsi və milli memarlıq üslubu ona xüsusi estetik görünüş qazandırır.
Hazırda ölkə əhəmiyyətli tarix-memarlıq abidələri siyahısına daxil edilən ev-muzeydə Sadıqcanın həyat və yaradıcılığına, Azərbaycan milli musiqi irsinə və Şuşanın zəngin mədəni mühitinə həsr olunmuş ekspozisiya zalları yaradılıb. Burada həmçinin konsert zalı, muğam ekspozisiya otağı, suvenir mağazası, kafe, qeydiyyat bölməsi və musiqi alətləri emalatxanası fəaliyyət göstərəcək.
Səfər çərçivəsində dövlət başçısına "Əbədiyyatın səsi" adlı heykəltəraşlıq əsəri barədə də məlumat verilib. Əsər Azərbaycanın milli musiqi aləti olan tarın bədii interpretasiyası kimi təqdim olunur. Kompozisiyada tarın simlərindən yaranan ağac obrazı musiqinin milli yaddaşdan qaynaqlandığını, köklərə bağlılığı və mənəvi dirçəlişi simvolizə edir.
Əməkdar rəssam tərəfindən hazırlanan əsər Azərbaycanın musiqi beşiyi hesab edilən şəhərinin zəngin mədəni irsinə ithaf olunub.
"Sadıqcanın evi"nin bərpası Şuşada həyata keçirilən genişmiqyaslı mədəni irsin qorunması və bərpası layihələrinin mühüm tərkib hissəsi olmaqla, Azərbaycan musiqi tarixinin görkəmli nümayəndələrinin xatirəsinin əbədiləşdirilməsinə xidmət edir.
