ABŞ-nin xüsusi xidmət orqanları İrandan göndərildiyi ehtimal edilən şifrəli mesajları ələ keçirdiyini açıqlayıb. Məlumatlara görə, həmin mesajların xaricdə fəaliyyət göstərən və “yatmış agentlər” kimi tanınan gizli şəbəkələr üçün nəzərdə tutulduğu ehtimal edilir.
Kəşfiyyat mənbələrinin bildirdiyinə görə, mesajlar xüsusi şifrələnmiş rabitə kanalları vasitəsilə ötürülüb və yalnız müəyyən kodlara malik şəxslər tərəfindən oxuna biləcək formada hazırlanıb. Hazırda mütəxəssislər mesajların məzmununun tam müəyyənləşdirilməsi və mümkün təhlükələrin qiymətləndirilməsi üçün onların deşifrə edilməsi üzərində işləyirlər.
ABŞ təhlükəsizlik qurumları bildirir ki, bu cür mesajların vaxtında ələ keçirilməsi potensial risklərin qarşısının alınması baxımından mühüm əhəmiyyət daşıyır. Hadisə ilə bağlı araşdırmalar davam edir və beynəlxalq təhlükəsizlik qurumları vəziyyəti diqqətlə izləyir.
