Azərbaycan Respublikasının Dövlət Təhlükəsizliyi Xidməti (DTX) tərəfindən xarici xüsusi xidmət orqanlarının ölkəmizin milli təhlükəsizliyinə yönələn kəşfiyyat-pozuculuq fəaliyyətinin qarşısının alınması istiqamətində əməliyyat-istintaq tədbirləri davam etdirilir.

DTX-nin Mətbuat Xidmətindən “Qafqazinfo”ya verilən məlumata görə, aparılan araşdırmalar zamanı Naxçıvan Muxtar Respublikasının sakini, 1969-cu il təvəllüdlü Siyafət Heydər oğlu Fərzəliyevin xarici ölkədə həmin dövlətin xüsusi xidmət orqanının nümayəndələri tərəfindən maddi maraq müqabilində məxfi əməkdaşlığa cəlb edildiyi müəyyən edilib.

Siyafət Fərzəliyev ölkəyə qayıtdıqdan sonra onların tapşırığı əsasında Naxçıvan şəhəri və Şahbuz rayonu ərazilərində yerləşən hərbi və strateji obyektlərin videoçəkilişlərini apararaq xarici xüsusi xidmət orqanının nümayəndələrinə təqdim edib.

Bundan əlavə, şəxsin yaşadığı mənzilə baxış zamanı “Kalaşnikov” tipli avtomat silahının ayrı-ayrı hissələri aşkarlanaraq götürülüb.
Siyafət Fərzəliyev Azərbaycan Respublikası Cinayət Məcəlləsinin 228.1-ci (qanunsuz odlu silah və sursat saxlama) və 274-cü (dövlətə xəyanət) maddələri ilə məsuliyyətə cəlb olunub və məhkəmənin qərarı ilə barəsində həbs qətimkan tədbiri seçilib.

Hazırda cinayət işi üzrə istintaq-əməliyyat tədbirləri davam etdirilir.