Misli Premyer Liqasında 4 gün ərzində iki dəfə Azərbaycan derbisi baş tutacaq. Qarşılaşmalar “Palms Sports Arena”da keçiriləcək.

Qanuntv.az xəbər verir ki, oyunlardan öncə ölkənin iki ən titullu klubu – “Neftçi” və “Qarabağ” birgə bəyanat yayıb.

Bəyanatda qeyd olunur ki, 26 və 30 aprel tarixlərində futbol ictimaiyyətinin diqqəti “Palms Sports Arena”ya yönələcək və azarkeşlərin böyük marağı səbəbindən hər iki oyunda tribunaların tam dolacağı gözlənilir.

Klublar vurğulayıb ki, “Neftçi” və “Qarabağ” arasında təxminən 35 ildir davam edən rəqabət hər zaman gərgin və maraqlı oyunlarla yadda qalır. Qarşıdakı görüşlərin də azarkeşlərə yüksək futbol həyəcanı yaşadacağı bildirilib.

Bəyanatda azarkeşlərə müraciət edilərək təmkinli olmağa, rəqibə və oyunun iştirakçılarına hörmət göstərməyə, həmçinin ədalətli oyun prinsiplərinə riayət etməyə çağırış edilib.

Qeyd olunub ki, futbol sadəcə bir oyun olmaqla yanaşı, milyonlarla insan üçün mənəvi dəyər daşıyır və meydanda baş verənlərin meydanda qalması vacibdir.
“Neftçi” və “Qarabağ” klubları qarşılaşmaların dostluq ab-havasında, eyni zamanda gərgin idman mübarizəsi şəraitində keçəcəyinə əmin olduqlarını bildirib və azarkeşləri stadiona dəvət edib.

Sonda bəyanatda “Azərbaycan futbolu qələbə qazansın!” ifadəsi yer alıb.