Şəmkir Rayon Mərkəzi Xəstəxanasında vətəndaş müraciətləri ilə bağlı narazılıqlar gündəmə gəlib.
Qanuntv.az-a daxil olan məlumatlara əsasən, xəstəxananın baş həkiminin katibəsi Quliyeva Güllü İlqar qızının vətəndaşlarla davranışı və ünsiyyət tərzi ciddi narazılıq doğurur.
İddialara görə, müxtəlif sənədlərin alınması və ya məsələlərin həlli məqsədilə xəstəxanaya müraciət edən bəzi vətəndaşlarla kobud və acılayıcı formada danışılır. Vətəndaşın müraciətinə izah vermək, istiqamətləndirmək və problemi həll etməyə kömək göstərmək əvəzinə, onun narazı və narahat vəziyyətdə xəstəxanadan ayrılması ilə nəticələnən münasibətin yolverilməz olduğu bildirilir.
Burada əsas məsələ konkret bir şəxsin davranışından daha böyükdür: dövlət tibb müəssisəsində vətəndaşla ünsiyyət mədəniyyəti.
Xəstəxanaya müraciət edən insan oraya kiminsə şəxsi qonağı kimi deyil, öz hüququndan istifadə edən vətəndaş kimi gəlir. Sənəd almaq, tibbi xidmət barədə məlumat əldə etmək və ya hər hansı məsələni dəqiqləşdirmək üçün müraciət edən şəxsin acılanması və ya kobud münasibətlə qarşılaşması normal xidmət anlayışı ilə uzlaşmır.
Məsələnin digər düşündürücü tərəfi isə ondan ibarətdir ki, daxil olan məlumatlarda katibənin davranışından yalnız vətəndaşların deyil, bəzi həkim və tibb işçilərinin də narazı olduğu iddia edilir.
Əgər bu məlumatlar təsdiqini taparsa, ortaya sadəcə bir əməkdaşın ünsiyyət problemi deyil, iş mühitində etik davranış və idarəçilik məsələsi çıxır. Çünki rəhbərliyin qəbuluna müraciət edən vətəndaşla ilkin təmas yaradan şəxsin davranışı həmin tibb müəssisəsi haqqında ilk təəssüratı formalaşdırır.
Bir sual da yaranır: Vətəndaş xəstəxanaya dərdini həll etmək üçün gəlir, yoxsa əlavə narazılıqla geri qayıtmaq üçün?
Tibb müəssisəsində çalışan şəxslərdən yalnız peşəkarlıq deyil, eyni zamanda yüksək davranış mədəniyyəti gözlənilir. Xüsusilə rəhbərliyin yanında çalışan və vətəndaşlarla birbaşa təmasda olan əməkdaşın hər bir davranışı həmin müəssisənin nüfuzuna təsir edir.
Bu səbəbdən Şəmkir Rayon Mərkəzi Xəstəxanasının rəhbərliyinə və aidiyyəti qurumlara sual ünvanlayırıq:
Vətəndaşlarla kobud davranış barədə daxil olan şikayətlər araşdırılıbmı?
Quliyeva Güllü İlqar qızının vətəndaşlarla ünsiyyəti ilə bağlı rəhbərliyə hər hansı müraciət daxil olubmu?
Əgər belə hallar baş veribsə, niyə bu barədə tədbir görülmür?
Vətəndaşın dövlət müəssisəsində hörmətlə qarşılanması xüsusi imtiyaz deyil – bu, normal xidmətin ayrılmaz hissəsidir.
Qanuntv.az olaraq məsələni diqqətdə saxlayırıq və Şəmkir Rayon Mərkəzi Xəstəxanasının rəhbərliyinin, eləcə də aidiyyəti qurumların mövqeyini dərc etməyə hazırıq.
