Avropa İttifaqının xarici siyasət və təhlükəsizlik üzrə ali nümayəndəsi Kaja Kallas ABŞ-ni Qrenlandiya ətrafında yaranan mübahisələrin Ukrayna məsələsindən diqqəti yayındırmamasına çağırıb.
O, bu barədə jurnalistlərə açıqlamasında bildirib. Kallas qeyd edib ki, hazırkı mərhələdə əsas prioritet Rusiyanın Ukraynaya qarşı apardığı müharibə və Kiyevə beynəlxalq dəstəyin davam etdirilməsidir. Onun sözlərinə görə, müttəfiqlər arasında istənilən fikir ayrılığı bu əsas gündəliyi kölgədə qoymamalıdır.
Aİ rəsmisi vurğulayıb ki, Qrenlandiya ilə bağlı məsələlər NATO daxilində və müttəfiqlər arasında dialoq yolu ilə həll edilə bilər. Kallas əlavə edib ki, bu cür mübahisələrin siyasi və ya ticarət təzyiqləri ilə gündəmə gətirilməsi Ukrayna münaqişəsi fonunda yanlış mesaj yarada bilər.
“Kollektiv təhlükəsizlik və Ukraynaya dəstək məsələsində diqqətin dağılması yalnız Rusiya kimi tərəflərin maraqlarına xidmət edir”, – deyə Kaja Kallas bildirib.
Qeyd edək ki, son günlər ABŞ ilə bəzi Avropa ölkələri arasında Qrenlandiyanın təhlükəsizliyi və statusu ilə bağlı fikir ayrılıqları müzakirə mövzusuna çevrilib.