Avropa İttifaqı (Aİ) Rusiyanın enerji sektorundan əldə etdiyi gəlirləri azaltmaq məqsədilə yeni sanksiya paketini hazırlayır.
Qanuntv.az xəbər verir ki, bu tədbirlər əsasən Rusiya neft və qaz ixracından əldə etdiyi gəlirləri məhdudlaşdırmağa, sanksiyalardan yayınma yollarını aradan qaldırmağa və “kölgə donanması” kimi vasitələrlə enerji satışını nəzarət altında saxlamağa yönəlib.

Almaniya Xarici İşlər Nazirliyinin məlumatına görə, yeni sanksiyalar enerji sektorunda Moskvanın gəlirlərini zəiflətməklə yanaşı, Aİ-nin kritik infrastrukturunu qorumaq və hibrid təhdidlərə qarşı hazırlıqlı olmaq məqsədi daşıyır. Əvvəlki qərarlara əsasən, Aİ mərhələli şəkildə Rusiya qazından asılılığını azaltmaq istiqamətində addımlar atıb və yeni paket bu siyasəti gücləndirəcək.

Ekspertlər bildirirlər ki, sanksiyaların effektiv tətbiqi Rusiya enerji gəlirlərinin əhəmiyyətli dərəcədə azalmasına səbəb olacaq və bu, Aİ-nin Rusiyaya qarşı iqtisadi təzyiq strategiyasının davamı hesab olunur.