Dövlətin iqtisadi dayanıqlığının təmin olunmasında vergi sisteminin rolu əvəzsiz hesab olunur. Lakin bəzi hallarda vergi ödəyiciləri müxtəlif səbəblərdən öhdəliklərini vaxtında yerinə yetirə bilmir və bu da vergi borclarının yaranmasına səbəb olur.

Qanuntv.az xəbər verir ki, mövzu ilə bağlı Azad Azərbaycan TV (ATV) tərəfindən hazırlanan videomaterialda vergi öhdəlikləri və tətbiq olunan tədbirlər barədə ətraflı məlumat verilib.



Vergi orqanları borclarla bağlı ödəyiciləri müxtəlif vasitələrlə əvvəlcədən məlumatlandırır və xəbərdarlıq edir. Hüquqşünas Şulan Nağıyev bildirib ki, borc ödənilmədikdə ilk addım bank hesablarına sərəncam qoyulmasıdır.

Onun sözlərinə görə, sərəncamlar iki formada tətbiq olunur:

İcra olunmalı sərəncam: Vergi ödəyicisinin bank hesabındakı vəsaitdən borcun və əlavə olaraq 105 faiz həcmində məbləğin tutulması və büdcəyə köçürülməsi. Bu, ödəyicinin razılığı olduqda və ya 30 gün ərzində məhkəməyə müraciət edilmədikdə icra olunur.

Dondurulmalı sərəncam: Ödəyici 30 gün müddətində borcu mübahisələndirərsə və ya yazılı razılıq verməzsə, vəsait yalnız dondurulur, lakin hesabdan çıxarılmır.
Sərəncamlar bütün bank hesablarına yönləndirilir və borc tam ödənildikdən sonra ləğv edilir. Əgər bu tədbirlər kifayət etməzsə, qanunvericiliyə uyğun digər məcburi icra mexanizmləri tətbiq olunur.

Vergi ödəyiciləri inzibati qərarlardan narazı qaldıqda 30 gün ərzində məhkəməyə müraciət edə bilirlər. Lakin öhdəliklərdən yayınma halları daha ciddi nəticələrə səbəb ola bilər.

Şulan Nağıyev qeyd edib ki, cinayət məsuliyyəti yarandığı halda vergi ödəyiciləri müxtəlif məbləğlərdə cərimə və ən ağır hallarda 5 ildən 7 ilədək azadlıqdan məhrumetmə cəzası ilə üzləşə bilərlər.