İsrail ordusunun Livan ərazisinə endirdiyi hava zərbələri nəticəsində ölənlərin sayı artmaqda davam edir. Son məlumatlara görə, hücumlar nəticəsində həyatını itirənlərin sayı 486 nəfərə çatıb.

Xarici KİV-in məlumatına görə, zərbələr əsasən Livanın cənub bölgələrində və bəzi yaşayış məntəqələrində həyata keçirilib. Hücumlar zamanı çox sayda mülki şəxsin də zərər gördüyü bildirilir.

Livan Səhiyyə Nazirliyi açıqlayıb ki, İsrailin zərbələri nəticəsində 1300-dən çox insan yaralanıb. Yaralıların bir qisminin vəziyyətinin ağır olduğu qeyd olunur.
İsrail tərəfi isə hücumların əsasən Livanın cənubunda fəaliyyət göstərən silahlı qruplaşmalara qarşı yönəldiyini bildirir. Buna baxmayaraq, bölgədə humanitar vəziyyətin sürətlə ağırlaşdığı vurğulanır.

Qeyd edək ki, son günlər Livan və İsrail arasında gərginlik kəskin şəkildə artıb. Beynəlxalq təşkilatlar tərəfləri münaqişəni daha da genişləndirməməyə və mülki əhalinin təhlükəsizliyini təmin etməyə çağırır.