Azərbaycan Respublikasının Prezidenti İlham Əliyev martın 27-də Gürcüstanın Azərbaycandakı səfirliyində olub.

Dövlət başçısı bütün Gürcüstanın Katalikos-Patriarxı II İliya həzrətlərinin vəfatı ilə əlaqədar başsağlığı verib.
Məlumata görə, Gürcüstanın Azərbaycandakı səfiri Zurab Pataradze Prezidenti qarşılayıb. İlham Əliyev matəm kitabına ürək sözlərini yazıb, daha sonra səfirlə söhbət edib.

Prezident İlham Əliyev qeyd edib ki, II İliya həzrətləri həyatını və fəaliyyətini nəcib amallara, dinlərarası dialoqun təşviqinə həsr edib və onun xatirəsi Azərbaycanda daim ehtiramla anılacaq.

Dövlət başçısı, həmçinin Azərbaycan-Gürcüstan arasında ənənəvi dostluq və əməkdaşlıq münasibətlərinin inkişafında Patriarxın mühüm rol oynadığını vurğulayıb.

Səfir Zurab Pataradze isə səfirliyə gələrək başsağlığı verdiyinə görə Prezident İlham Əliyevə minnətdarlığını ifadə edib.