Qobustan rayonunda ölümlə nəticələnən yol-nəqliyyat hadisəsi zamanı xəsarət alanların son durumu məlum olub.

Qanuntv.az xəbər verir ki, bu barədə TƏBİB məlumat yayıb.

Bildirilib ki, iyulun 5-də saat 17:50-də Bakı–Şamaxı–Yevlax avtomobil yolunun Qobustan rayonu ərazisindən keçən hissəsində baş vermiş yol-nəqliyyat hadisəsi nəticəsində xəsarət alan yeddi nəfər (altı kişi və bir qadın) Qobustan Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Müxtəlif dərəcəli bədən xəsarətləri alan şəxslərə zəruri tibbi yardım göstərilib. Vəziyyəti qənaətbəxş qiymətləndirilən bir nəfər ambulator müalicə üçün evə buraxılıb, iki nəfər isə yazılı iltizamnamə əsasında müalicədən imtina edib.

Daha ixtisaslaşmış tibbi xidmət almaq məqsədilə bir nəfər Şamaxı Rayon Mərkəzi Xəstəxanasına, bir nəfər Sabunçu Tibb Mərkəzinə, bir nəfər isə Kliniki Tibbi Mərkəzə təxliyə olunub. Hazırda onların müalicəsi müvafiq şöbələrdə davam etdirilir.

Məlumata görə, xəsarət alanlardan birinin vəziyyəti orta ağır, digər şəxslərin vəziyyəti isə stabil qiymətləndirilir.

Qeyd olunub ki, Qobustan Rayon Mərkəzi Xəstəxanasına kritik ağır vəziyyətdə çatdırılan bir nəfərin həyatını xilas etmək mümkün olmayıb. Aparılan reanimasiya tədbirlərinə baxmayaraq, həmin şəxsin saat 21:30-da bioloji ölümü qeydə alınıb.