Bakı şəhərinin Səbail rayonunun Badamdar qəsəbəsində yerləşən beşmərtəbəli yaşayış binasında partlayış baş verib.

Qanuntv.az xəbər verir ki, Fövqəladə Hallar Nazirliyinin “112” qaynar telefon xəttinə daxil olan məlumat əsasında FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri hadisə yerinə cəlb olunub.



İlkin araşdırma zamanı müəyyən edilib ki, partlayış binanın birinci mərtəbəsində yerləşən mənzilin hamam otağında, ilkin ehtimala görə, qazla işləyən cihazda baş verib. Hadisə yerində müvafiq təhlükəsizlik tədbirləri görülüb.

Partlayış nəticəsində 2006-cı il təvəllüdlü kişi xəsarət alıb. Təcili tibbi yardım briqadası tərəfindən o, Nərimanov Tibb Mərkəzinin nəzdindəki Yanıq Mərkəzinə hospitalizasiya olunub.

Həkimlər pasiyentə baş, boyun, gövdə, hər iki aşağı və yuxarı ətrafların II-III dərəcəli termiki alov yanığı diaqnozu qoyublar.

Hazırda yaralının müalicəsi Reanimasiya şöbəsində davam etdirilir. Onun vəziyyəti ağır qiymətləndirilir.

Hadisə ilə bağlı aidiyyəti qurumlar tərəfindən araşdırma aparılır.