18 sentyabr Azərbaycanın dahi bəstəkarı, Azərbaycan professional musiqi sənətinin banisi Üzeyir Hacıbəyovun doğum günüdür. Bu əlamətdar tarix ölkəmizdə Milli Musiqi Günü kimi qeyd olunur.
Qanuntv.az xəbər verir ki, 1995-ci ildə Üzeyir Hacıbəyovun anadan olmasının 110 illik yubileyi ərəfəsində Heydər Əliyevin fərmanı ilə 18 sentyabrın Milli Musiqi Günü kimi qeyd olunması qərara alınıb.
Milli Musiqi Gününün qeyd edilməsi ənənəsinin əsasını maestro Niyazi qoyub. Üzeyir Hacıbəyovun vəfatından sonra Niyazi hər il bəstəkarın doğum gününü xüsusi tədbirlərlə qeyd edib. Ənənəvi olaraq həmin tarixdə Azərbaycan Dövlət Konservatoriyasının, hazırkı Bakı Musiqi Akademiyasının qarşısında minlərlə insan toplaşıb. Üzeyir Hacıbəyovun adını daşıyan Azərbaycan Dövlət Simfonik Orkestri Niyazinin rəhbərliyi ilə bəstəkarın əsərlərini ifa edib.
Mədəniyyət ocaqlarında və musiqi məktəblərində, xüsusilə Bakı Musiqi Akademiyasının qarşısında Üzeyir Hacıbəyovun ölməz əsərlərindən parçalar səsləndirilib. Lakin ötən əsrin 90-cı illərinin əvvəllərində Azərbaycanda, xüsusilə Bakıda yaşanan siyasi böhranla əlaqədar bu ənənə bir müddət davam etdirilməyib.
Hazırda Milli Musiqi Günü ölkənin müxtəlif mədəniyyət müəssisələrində silsilə tədbirlərlə qeyd olunur. Mədəniyyət Nazirliyi tərəfindən bu münasibətlə müxtəlif konsertlər, musiqi gecələri və mədəni tədbirlər təşkil edilir.
Bakı Musiqi Akademiyasının qarşısında Milli Musiqi Gününə həsr olunmuş təntənəli mərasim keçirilir, Üzeyir Hacıbəyovun ev-muzeyində müxtəlif mədəni tədbirlər təşkil olunur. Həmçinin Heydər Əliyev Sarayında dahi bəstəkarın xatirəsinə həsr olunmuş konsert proqramları təqdim edilir.
18 sentyabr həm də Azərbaycan musiqi mədəniyyətinin zəngin irsinin, Üzeyir Hacıbəyov yaradıcılığının və milli musiqi ənənələrinin yaşadılmasının rəmzi tarixlərindən biri kimi qeyd olunur.
