Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Ərəb Media Forumunda çıxış edib.
Qanuntv.az xəbər verir ki, Hikmət Hacıyev bu barədə “X” sosial şəbəkəsindəki hesabında paylaşım edib.
Hacıyev forumda Qafqaz Albaniyasının qədim krallığı və onun zəngin xristian irsi barədə danışıb. O bildirib ki, həmin irsin xüsusilə mühüm və davamlı izlərini Qarabağda və Azərbaycanın digər bölgələrində görmək mümkündür.
Azərbaycanın əsrlər boyu davam edən multikulturalizm və dini birgəyaşayış ənənəsinə toxunan Prezidentin köməkçisi ölkənin mənşəyindən və dini mənsubiyyətindən asılı olmayaraq, zəngin mədəni və dini irsin qorunmasına, saxlanılmasına və bərpasına sadiqliyini vurğulayıb.
Hikmət Hacıyev həmçinin işğal illərində Azərbaycanın dini və mədəni irsinin genişmiqyaslı şəkildə dağıdılması, təhqir edilməsi və dəyişdirilməsi məsələsinə toxunub. O, tarixi həqiqətin qorunmasının və mədəni irsin gələcək nəsillər üçün saxlanılmasının vacibliyini qeyd edib.
Qeyd edək ki, Hikmət Hacıyev forumda Gürcüstanın xarici işlər naziri və Birləşmiş Ərəb Əmirliklərinin iqtisadiyyat və turizm naziri ilə birlikdə paneldə iştirak edib. Panelə “Euronews”un baş icraçı direktoru moderatorluq edib.
