Penitensiar Xidmətin zabiti, polkovnik Elçin Əzizova qarşı zor tətbiq etməkdə təqsirləndirilən Amal Zülfüqarlının cinayət işi üzrə məhkəmə istintaqı yekunlaşıb.
Qanuntv.az xəbər verir ki, Bakı Ağır Cinayətlər Məhkəməsində hakim Roman Ələkbərlinin sədrliyi ilə keçirilən məhkəmə iclasında sənədlərin tədqiqi mərhələsi başa çatıb.
İclas zamanı təqsirləndirilən şəxsin vəkili Amal Zülfüqarlının psixoloji vəziyyəti ilə bağlı təkrar ekspertizanın keçirilməsi barədə vəsatət qaldırıb. Lakin məhkəmə vəsatəti təmin etməyib.
Bundan sonra məhkəmə istintaqının yekunlaşdığı elan olunub.
Məhkəmədə növbəti mərhələ tərəflərin çıxışlarına həsr olunacaq. Çıxışlar üçün növbəti məhkəmə iclası sentyabrın 22-nə təyin edilib.
Qeyd edək ki, ittihama əsasən, hadisə Penitensiar Xidmətin 7 saylı cəzaçəkmə müəssisəsində baş verib. Həmin müəssisədə cəza çəkən və məhkəmənin hökmü ilə 19 il müddətinə azadlıqdan məhrum edilmiş Amal Zülfüqarlının müəssisənin təsərrüfat bölməsinin rəisi, polkovnik Elçin Əzizova qarşı zor tətbiq etdiyi bildirilir.
Amal Zülfüqarlı daha əvvəl, 2018-ci ildə Bakıda tanışını boğaraq öldürməkdə təqsirləndirilib və məhkəmənin hökmü ilə 19 il müddətinə azadlıqdan məhrum edilib.
Hazırkı cinayət işi üzrə isə ona Azərbaycan Respublikası Cinayət Məcəlləsinin 317.3-cü maddəsi ilə ittiham irəli sürülüb.
Həmin maddə cəzaçəkmə müəssisəsinin və ya istintaq təcridxanasının əməkdaşına, yaxud məhkuma qarşı hədələmə və ya zor tətbiq etmə əməllərinin ağır nəticələrə səbəb olduğu halları nəzərdə tutur. Bu maddənin sanksiyasına əsasən, əməli törətmiş şəxsin 7 ildən 12 ilədək müddətə azadlıqdan məhrum edilməsi nəzərdə tutulur.
Məhkəmənin yekun qərarı çıxışlardan və tərəflərin mövqelərinin dinlənilməsindən sonra məlum olacaq.
