Xaçmaz rayon prokurorluğu və rayon polis şöbəsinin birgə əməliyyatı nəticəsində 2023-cü ilin yanvar ayında itkin düşmüş Xaçmaz sakini, 1987-ci il təvəllüdlü Əmirəddin Əkbərovun qəsdən öldürülməsi faktı müəyyən edilib.
İstintaq və əməliyyat-axtarış tədbirləri zamanı 1975-ci il təvəllüdlü Surəddin Həsənalıyevin aralarındakı mübahisə zamanı Əmirəddin Əkbərovu odlu silahdan atəş açaraq qəsdən öldürməsi və cinayətin izlərini gizlətmək məqsədilə meyiti basdırması müəyyən edilib.
Əkbərovun meyiti prokuror-kriminalist və ekspertin iştirakı ilə çıxarılaraq müvafiq ekspertizaya təqdim olunub.
Faktla bağlı Xaçmaz rayon prokurorluğunda Cinayət Məcəlləsinin 120.1-ci maddəsi (qəsdən adam öldürmə) ilə cinayət işi başlanıb.
Saxlanılmış Surəddin Həsənalıyev şübhəli şəxs qismində istintaqa təhvil verilib. Hazırda iş üzrə istintaq və əməliyyat-axtarış tədbirləri davam etdirilir.