Corf Lasfar, Mərakeş – Mərakeş sahillərində “Lady Mina” adlı yük gəmisində qalan bir qrup azərbaycanlı və gürcüstanlı dənizçi vəziyyətlərinin kritik olduğunu bildirib və yardım çağırışı edib. İşçilər gəminin mülkiyyətçisi olan şirkətin onları riskli zonalara məcburi göndərməyə çalışdığını iddia edirlər.

Dənizçilər əməkhaqqı üç aydan çoxdur almadıqlarını, əmək müqavilələrinin pozulduğunu bildirirlər. Onlar həmçinin gəminin əsas mühərrikində ciddi nasazlıqların olduğunu və bu səbəbdən texniki baxımdan ağır dəniz şəraitində təhlükəsiz sayılmadığını vurğulayıblar.

Ekipajın sözlərinə görə, gəmi sahibləri onları Afrikanın Qana və Kamerun sahilləri istiqamətində, yolun bir hissəsi kimi riskli zonalar hesab olunan ərazilərə aparmaq istəyir. Bu zonalar sarı qızdırma, malyariya və digər təhlükəli xəstəliklərin yayılması ilə bağlı risk daşıyır. Dənizçilər lazımi peyvənd və təhlükəsizlik təlimləri ilə təmin olunmadıqlarını bildiriblər.

Hazırda dənizçilər Azərbaycan və Gürcüstan rəhbərliyindən tekniki yoxlama, ödənilməmiş əməkhaqqıların verilməsi və doğma ölkələrinə geri qaytarılmaları üçün müdaxilə tələb edirlər. Onlar limandan çıxmağa icazə verilmədiyini və daha təhlükəli vəziyyətə sürüklənməkdən narahat olduqlarını bildiriblər.

“Lady Mina” gəmisinin 1989‑cu ildə inşa olunduğu və Tanzaniya bayrağı altında üzməsi qeyd edilir. Rəsmi qurumlardan bu məsələ ilə bağlı hələlik hər hansı açıqlama gəlməyib.