Gürcüstanda qətlə yetirilən Azərbaycan vətəndaşı, 28 oktyabr 2005-ci il təvəllüdlü Fatimə Kərimovanın ölümü ilə bağlı yeni təfərrüatlar məlum olub.

Qanuntv.az xəbər verir ki, Oxu.Az-ın əldə etdiyi məlumata əsasən, faktla bağlı Gürcüstan Cinayət Məcəlləsinin 108-ci maddəsi ilə cinayət işi başlanılıb.

Bildirilib ki, hadisə iyunun 27-də Tbilisi şəhərinin Yevqeni Maisuradze küçəsi, 1 ünvanında qeydə alınıb.

İstintaq materiallarına görə, Fatimə Kərimova yaxınlarının təkidi ilə istəmədiyi şəxslə nişanlanıb və bu səbəbdən ailə üzvləri ilə münasibətləri gərginləşib. Məlumata əsasən, 2026-cı ilin may ayında o, sevgilisi Kənan Əliyevlə birlikdə Azərbaycandan Gürcüstana gedib. Bir müddət sonra onların münasibətlərinin pisləşdiyi, Kənan Əliyevin Fatimənin pasportunu cıraraq Azərbaycana qayıtdığı bildirilir.

Çətin vəziyyətdə qalan Fatimə qohumu Emin Əliyevdən kömək istəyib. 2001-ci il təvəllüdlü Emin Əliyevin iyunun 3-də Tbilisiyə gedərək sonradan hadisənin baş verdiyi mənzili kirayələdiyi qeyd olunur.

İstintaqın ilkin məlumatına görə, iyunun 26-da kirayə qaldıqları evdə Fatimə Kərimova ilə Emin Əliyev arasında münaqişə baş verib. Münaqişə zamanı Emin Əliyevin gənc qızı boğaraq öldürdüyü iddia edilir.

Məlumata görə, hadisədən sonra Emin Əliyev Gürcüstandan Türkiyəyə qaçıb.

Qeyd edək ki, Fatimə Kərimovanın nəşi Azərbaycana gətirilərək Ağcabədi şəhər qəbiristanlığında dəfn olunub.

Xatırladaq ki, Fatimə Kərimovanın anası 2020-ci ildə, atası isə iki il sonra xərçəng xəstəliyindən vəfat edib.

Faktla bağlı Gürcüstanın hüquq-mühafizə orqanları tərəfindən araşdırmalar davam etdirilir.