Azərbaycan Respublikasının Prezidenti İlham Əliyev iyulun 11-də Şuşa rayonunun Kiçik Qaladərəsi kəndinə səfər edib. Dövlət başçısı kənddə fərdi yaşayış evlərinin və sosial infrastrukturun bərpası istiqamətində görülən işlərlə tanış olub, doğma yurdlarına qayıdan sakinlərlə görüş keçirib.
Qanuntv.az xəbər verir ki, Azərbaycan Respublikası Prezidentinin Şuşa rayonunda xüsusi nümayəndəsi Aydın Kərimov dövlət başçısına kənddə həyata keçirilən layihələr barədə ətraflı məlumat verib.
Bildirilib ki, Kiçik Qaladərəsi kəndində ümumilikdə 66 fərdi yaşayış evi mövcuddur. Onlardan 19-u tam yararsız, 47-si isə qismən yararlı vəziyyətdədir. Hazırda 26 ev tam bərpa olunaraq istifadəyə verilib. Gələn il isə daha 21 evin sakinlərin istifadəsinə təqdim olunması nəzərdə tutulur.
Məlumata görə, ilkin mərhələdə kəndə 15 ailə olmaqla 51 nəfər köçürülüb. Bu ilin sonunadək əlavə olaraq 11 ailənin, ümumilikdə isə 45 nəfərin doğma torpaqlarına qayıdışı təmin ediləcək.
Kənddə müasir sosial infrastrukturun yaradılması istiqamətində mühüm işlər görülüb. Yeni qaz və su xətləri çəkilib, artezian quyusu bərpa olunub, yaşayış evləri su şəbəkəsinə qoşulub. Eyni zamanda transformator məntəqəsi quraşdırılıb, elektrik xətləri yenilənib, kənddaxili yollar asfaltlanıb, sakinlərin istirahəti üçün park və Bayraq meydanı salınıb.
Prezident İlham Əliyev kənd sakini, Vətən müharibəsi iştirakçısı Əsəd Əsədovun evində olub, ailə üzvləri ilə səmimi söhbət aparıb. Dövlət başçısı kənd sakinlərinin yaşayış şəraiti ilə maraqlanıb, onların məşğulluq imkanları barədə fikir mübadiləsi aparıb.
Sakinlər Prezident İlham Əliyevə göstərilən diqqət və qayğıya görə minnətdarlıqlarını ifadə edərək, doğma yurdlarına qayıtmağın böyük sevinc olduğunu bildiriblər.
Daha sonra dövlət başçısı kəndə qayıdan digər sakinlərlə görüşüb. Prezident İlham Əliyev çıxışında bildirib ki, uzun illər davam edən məcburi köçkünlük həyatı artıq geridə qalıb və Qarabağda yeni həyatın qurulması prosesi uğurla davam edir.
Dövlət başçısı vurğulayıb ki, Azərbaycan xalqının birliyi, Ordumuzun qəhrəmanlığı və şəhidlərimizin fədakarlığı nəticəsində tarixi ədalət bərpa olunub və bu gün Qarabağda genişmiqyaslı bərpa-quruculuq işləri həyata keçirilir.
Qeyd edək ki, Kiçik Qaladərəsi kəndi 1992-ci ildə Ermənistan silahlı qüvvələri tərəfindən işğal edilmiş, 2023-cü ilin sentyabrında həyata keçirilən lokal antiterror tədbirləri nəticəsində tam azad olunmuşdur. İşğaldan əvvəl kənd sakinləri əsasən heyvandarlıq, tərəvəzçilik və arıçılıqla məşğul olublar.
Səfərin sonunda Prezident İlham Əliyev sakinlərlə xatirə şəkilləri çəkdirib.
Qanuntv.az
