Azərbaycan Respublikasının Prezidenti İlham Əliyev və Slovakiya Respublikasının Prezidenti Peter Pelleqrini iyulun 14-də Şuşada mətbuata birgə bəyanatlarla çıxış ediblər.
Qanuntv.az xəbər verir ki, dövlət başçıları əvvəlcə təkbətək və geniş tərkibdə görüş keçirərək Azərbaycan-Slovakiya münasibətlərinin hazırkı vəziyyəti və gələcək əməkdaşlıq perspektivlərini müzakirə ediblər.
Prezident İlham Əliyev çıxışı zamanı Slovakiya Prezidentinin Şuşaya səfərinin xüsusi əhəmiyyət daşıdığını vurğulayaraq, bunu Azərbaycan-Slovakiya əlaqələrinin yüksək səviyyəsinin göstəricisi kimi qiymətləndirib. Dövlət başçısı Slovakiyanın Qarabağ və Şərqi Zəngəzurda həyata keçirilən bərpa və quruculuq prosesində fəal iştirak etdiyini bildirib.
Prezident İlham Əliyev həmçinin qeyd edib ki, iki ölkə arasında siyasi dialoq uğurla inkişaf edir və enerji, iqtisadiyyat, investisiya, nəqliyyat və digər sahələrdə əməkdaşlığın genişləndirilməsi üçün böyük potensial mövcuddur.
Slovakiya Prezidenti Peter Pelleqrini isə Azərbaycanın regionun mühüm dövlətlərindən biri olduğunu bildirərək, ölkələr arasında münasibətlərin daha da inkişaf etdirilməsində maraqlı olduqlarını diqqətə çatdırıb. O, Azərbaycanın Avropanın enerji təhlükəsizliyində mühüm rol oynadığını da vurğulayıb.
Qeyd edək ki, Peter Pelleqrininin Azərbaycana səfəri çərçivəsində Şuşada rəsmi qarşılanma mərasimi keçirilib, daha sonra dövlət başçıları bir sıra məsələlər ətrafında fikir mübadiləsi aparıblar. Səfər Azərbaycan-Slovakiya əlaqələrinin inkişafı baxımından mühüm siyasi hadisə kimi qiymətləndirilir. 
