2022-ci ildə Rusiyanın Ukraynaya qarşı genişmiqyaslı müharibəyə başlaması Avropanın təhlükəsizlik siyasətində ciddi dönüş nöqtəsi yaradıb. Uzun illər ərzində genişmiqyaslı müharibə ehtimalını minimum hesab edən Avropa dövlətləri artıq mülki müdafiə sistemlərini yenidən qurmağa başlayıblar.
Qanuntv.az xəbər verir ki, xüsusilə Almaniya, Polşa, Baltikyanı ölkələr və Skandinaviya regionunda bunker və sığınacaqların bərpası, yeni fövqəladə vəziyyət planlarının hazırlanması və əhalinin mümkün təhlükələrə qarşı maarifləndirilməsi istiqamətində geniş işlər aparılır.
Ekspertlərin fikrincə, Rusiya-Ukrayna müharibəsi göstərdi ki, müasir dövrdə təhlükələr yalnız cəbhə xəttində deyil, mülki infrastruktur üçün də ciddi risklər yaradır. Məhz buna görə Avropa ölkələri müharibə, kibertəhlükələr, terror aktları və digər fövqəladə hallara qarşı dayanıqlılıq strategiyalarını gücləndirməyə çalışırlar.
Ukraynalı politoloq Aleksandr Kovalenko hesab edir ki, Avropa Rusiyanın xüsusilə Polşa və Baltikyanı ölkələrə qarşı mümkün təhlükəsini ciddi qəbul edir. Onun sözlərinə görə, qitə ölkələri artıq gələcək risklərə hazır olmaq üçün hərbi və mülki müdafiə imkanlarını genişləndirirlər.
İtaliyalı beynəlxalq münasibətlər eksperti Domeniko Letisiya isə qeyd edir ki, sığınacaqların yenidən gündəmə gəlməsi müharibə təşvişindən deyil, praqmatik təhlükəsizlik yanaşmasından qaynaqlanır. O bildirib ki, Avropa hökumətləri cəmiyyətdə qorxu yaratmağa deyil, fövqəladə vəziyyətlərə hazırlığı artırmağa çalışırlar.
Türkiyəli siyasi şərhçi Engin Özerin fikrincə, ABŞ-də Donald Tramp administrasiyasının xarici siyasətdə həyata keçirdiyi dəyişikliklər də Avropanın təhlükəsizlik konsepsiyasına təsir göstərib. Vaşinqtonun diqqətini daha çox Asiya-Sakit okean regionuna yönəltməsi Avropa İttifaqını daha müstəqil müdafiə strategiyası formalaşdırmağa sövq edib.
Mütəxəssislər bildirirlər ki, hazırda Avropa ölkələri üçün təhlükəsizlik anlayışı yalnız güclü ordu ilə məhdudlaşmır. Mülki infrastrukturun dayanıqlılığı, bunker və sığınacaqların mövcudluğu, əhalinin fövqəladə hallara hazırlıq səviyyəsi də milli təhlükəsizliyin əsas komponentlərindən biri hesab edilir.
Beləliklə, "qoca qitə" uzun illər davam edən geosiyasi rahatlıq dövrünü geridə qoyaraq yeni təhlükəsizlik reallıqlarına uyğunlaşmağa çalışır. Avropada bunker və sığınacaqların yenidən gündəmə gəlməsi müharibəyə hazırlıq görüntüsü yaratsa da, əslində bu, artan qlobal risklər fonunda təhlükəsizlik və dayanıqlılığın gücləndirilməsinə hesablanmış strateji addım kimi qiymətləndirilir.
Qanuntv.az
