Yevlax rayonunda baş verən faciəli hadisə ictimaiyyətdə dərin kədər doğurub. Qida zəhərlənməsi şübhəsi ilə xəstəxanaya aparılan 16 yaşlı Mədinə Əzizova yolda həyatını itirib.
Mərhumun atası Xalid Əzizov bildirib ki, qızı hadisə zamanı xalasıgilə qonaq gedib. Onun sözlərinə görə, Mədinə yeməkdən bir müddət sonra özünü pis hiss etməyə başlayıb və qusub. Vəziyyətinin ağırlaşdığını görən yaxınları onu xəstəxanaya aparsalar da, artıq gec olub.
"Qızım yeni tədris ilində 11-ci sinfə keçəcəkdi. Çox arzuları var idi. Təəssüf ki, arzuları yarımçıq qaldı. Hələ də baş verənlərə inana bilmirik. Müayinələrin nəticəsini gözləyirik ki, hansı qidadan zəhərləndiyi dəqiq məlum olsun", – deyə ata bildirib.
Xalid Əzizov qeyd edib ki, hadisə baş verən zaman işdə olub və ailəsini dolandırmaq üçün fəhlə kimi çalışır. O, həmçinin xəstəxanaya çatdırılmada müəyyən gecikmənin olduğunu, mağazadan alınan bəzi qidaların, eləcə də suxarinin zəhərlənməyə səbəb ola biləcəyini ehtimal etdiyini bildirib. Bununla belə, o vurğulayıb ki, yekun nəticəni yalnız rəsmi ekspertiza müəyyən edə bilər.
Məlumata görə, 2010-cu il təvəllüdlü Mədinə Əzizova qida zəhərlənməsi şübhəsi ilə Yevlax Rayon Mərkəzi Xəstəxanasına aparılarkən yolda vəfat edib.
Azərbaycan Respublikasının Qida Təhlükəsizliyi Agentliyi (AQTA) hadisənin nəzarətdə saxlanıldığını açıqlayıb. Bildirilib ki, qida zəhərlənməsi ehtimalının araşdırılması məqsədilə AQTA-nın mütəxəssisləri digər aidiyyəti qurumlarla birlikdə araşdırmalara başlayıblar. Nəticələr ictimaiyyətə təqdim olunacaq.
TƏBİB-dən verilən məlumata görə, iyulun 28-də saat 17:30-da Yevlax şəhərinin Salatın Əsgərova küçəsi ərazisindən təcili tibbi yardıma çağırış daxil olub. Hadisə yerinə göndərilən briqada bir nəfər qadının həkiməqədər ölüm faktını qeydə alıb.
Faktla bağlı araşdırma davam etdirilir. Hadisənin dəqiq səbəbi məhkəmə-tibbi ekspertizanın və laborator analizlərin nəticəsindən sonra məlum olacaq.
