Binəqədi rayon bələdiyyəsinin keçmiş sədri Aytac Əliyeva və bacısı İlknur Əliyevanın (Turkut) cinayət işi üzrə hökmdən verilən kassasiya şikayəti üzrə məhkəmə iclası keçirilib.
Qanuntv.az Axar.az-a istinadən APA xəbər verir ki, Ali Məhkəmədə hakim Hafiz Nəsibovun sədrliyi ilə keçirilən prosesdə qərar elan olunub.
Qərara əsasən, İlknur Turkutun kassasiya şikayəti təmin edilməyib. Aytac Əliyevanın kassasiya şikayəti isə qismən təmin olunub. Belə ki, ona qarşı Cinayət Məcəlləsinin 308.1-ci maddəsi üzrə irəli sürülmüş ittiham hökmün tərkibindən çıxarılıb.
Ali Məhkəmənin qərarı ilə Aytac Əliyevaya 2 il 6 ay müddətinə vəzifə tutmaq hüququndan məhrum edilməklə, 6 il 6 ay müddətinə azadlıqdan məhrumetmə cəzası təyin edilib.
Qeyd edək ki, Bakı Ağır Cinayətlər Məhkəməsinin hökmü ilə Aytac Əliyeva 7 il, bacısı İlknur Turkut isə 6 il müddətinə azadlıqdan məhrum edilmişdi. İlknur Turkut məhkəmə zalında həbs olunmuşdu. Hökmdə Aytac Əliyevanın 3 il müddətinə dövlət qulluğunda çalışmasının qadağan edilməsi də nəzərdə tutulmuşdu.
Bakı Apellyasiya Məhkəməsinin qərarı ilə həmin hökm qüvvədə saxlanılmışdı.
Xatırladaq ki, Aytac Əliyeva və bacısı İlknur Əliyeva (Turkut) vətəndaşlara qarşı təxminən 1 milyon manat məbləğində dələduzluq etməkdə ittiham olunublar. Onlar barəsində Cinayət Məcəlləsinin 178.3.2-ci maddəsi ilə cinayət işi başlanıb və barələrində həbs qətimkan tədbiri seçilib.