Dünya aviasiya tarixində ilk dəfə olaraq Türkiyədə iki pilotsuz döyüş təyyarəsi tam avtonom rejimdə bir-birinə çox yaxın məsafədə uçuş həyata keçirib.
Türkiyənin yerli və milli pilotsuz döyüş təyyarəsi olan “Bayraktar Kızılelma” layihəsinin inkişaf mərhələsi yeni texnoloji imkanların əlavə olunması ilə mərhələli şəkildə davam etdirilir. Bu çərçivədə Çorlu şəhərində yerləşən AKINCI Uçuş Təlim və Sınaq Mərkəzində mühüm sınaq uçuşu reallaşdırılıb.
Sınaq zamanı “Bayraktar Kızılelma”nın PT3 (üçüncü prototip) və PT5 (beşinci prototip) modelləri ardıcıl şəkildə havaya qalxaraq eyni vaxtda tapşırıq icra ediblər. Uçuş zamanı pilotsuz döyüş təyyarələri “Baykar” şirkətinin mühəndisləri tərəfindən hazırlanmış ağıllı avtonom filo sistemləri vasitəsilə bir-biri ilə koordinasiyalı şəkildə hərəkət edib.
Avtonom döyüş pilotu rejimində həyata keçirilən bu uçuşda təyyarələr formasiya şəklində, insan müdaxiləsi olmadan idarə olunub. Nəticədə, aviasiya tarixində ilk dəfə olaraq iki pilotsuz döyüş təyyarəsi bir-birinə minimal məsafədə tam avtonom uçuş həyata keçirmiş olub.
Bu nailiyyət pilotsuz aviasiya sahəsində Türkiyənin texnoloji imkanlarının yeni mərhələyə yüksəldiyini göstərir.