Bu gün İranın ali rəhbəri Ayətullah Əli Xamenei “19 Bəhmən” (8 fevral) münasibətilə Hərbi Hava Qüvvələrinin komandirləri ilə ənənəvi görüş keçirməyib.
Qanuntv.az xəbər verir ki, bu hadisə son onilliklər ərzində qeydə alınan qeyri-adi vəziyyət kimi qiymətləndirilir.
Məlumata görə, Hərbi Hava Qüvvələrinin komandirləri ilə keçirilən görüş mərasimi Tehranda İslam Respublikasının banisi Ruhullah Xomeyninin məqbərəsində təşkil olunub. Tədbir Xameneinin iştirakı olmadan baş tutub.
İranlı jurnalist Xəyal Müəzzinin sözlərinə görə, təhlükəsizliklə bağlı narahatlıqlar səbəbindən Ayətullah Xameneinin bugünkü çıxışı ləğv edilib.
Qeyd olunur ki, bu, son 47 il ərzində ilk dəfədir ki, İran lideri 19 Bəhmən günü ilə əlaqədar Xomeyninin xatirəsinə həsr olunan tədbirdə Hərbi Hava Qüvvələri ilə birgə görüş keçirmir.