Bəhreyn ərazisindən İran istiqamətində ballistik raketlərin buraxıldığı iddia olunur.
Qanuntv.az xəbər verir ki, bu barədə The New York Times nəşrinin yaydığı məlumatda bildirilib. Məlumata görə, təsdiqlənmiş video görüntülərdə Bəhreynin şimal hissəsindən İran istiqamətində iki raketin buraxıldığı görünür. Nəşrin istinad etdiyi ekspertlərin fikrincə, görüntülərdə ABŞ istehsalı olan M142 HIMARS tipli raket buraxılış sistemi seçilir, lakin raketlərin ABŞ və ya Bəhreyn qüvvələri tərəfindən atıldığı hələ dəqiq müəyyənləşməyib.
Qeyd olunur ki, bu, müharibə başlayandan bəri Fars körfəzi ölkələrindən birinin ərazisindən İrana qarşı həyata keçirilmiş ilk təsdiqlənmiş hücum ola bilər. Eyni zamanda, Bəhreyn hökuməti hücum əməliyyatlarında iştirak etmədiyini açıqlayıb.
Xatırladaq ki, Bəhreyndə ABŞ Hərbi Dəniz Qüvvələrinin Beşinci Donanmasının bazası yerləşir. Bu səbəbdən raketlərin hansı tərəfə məxsus olması məsələsi hələ də açıq qalır.
Bundan əvvəl Bəhreyn BMT Təhlükəsizlik Şurasında İrandan qonşu ölkələrə zərbələri dayandırmağı tələb etmişdi. Bununla belə, yayılan məlumatlarda ABŞ və İsrailin İran ərazisinə endirdiyi zərbələrlə bağlı hər hansı qınamanın yer almadığı bildirilir.
