ABŞ və İran arasında əldə olunan ikihəftəlik atəşkəs razılaşmasının Livana şamil olunmadığı bildirilib. Bu barədə “The Times of Israel” nəşri İsrailin Baş naziri Benyamin Netanyahunun ofisinə istinadən məlumat yayıb.

Məlumata görə, İsrailin Livandakı şiə hərəkatı olan “Hizbullah”a qarşı əməliyyatlarını dayandıracağına dair heç bir əlamət müşahidə olunmur. Bu isə bölgədə gərginliyin davam edəcəyini göstərir.

Bundan əvvəl isə Pakistanın Baş naziri Şahbaz Şərif fərqli mövqe ortaya qoyaraq, ABŞ və İran arasında razılaşdırılmış atəşkəsin təkcə iki ölkə arasında deyil, həm də Livanda və ümumilikdə regionda qüvvədə olmasının nəzərdə tutulduğunu bildirib.

Şahbaz Şərif bu addımı “müdrik jest” adlandıraraq alqışlayıb və tərəfləri yekun sülh razılaşmasına nail olmaq üçün danışıqları davam etdirməyə çağırıb. O, həmçinin ABŞ və İran nümayəndə heyətlərini 10 aprel 2026-cı ildə İslamabadda keçiriləcək görüşə dəvət edib.
Mövcud ziddiyyətli açıqlamalar fonunda regionda vəziyyətin necə inkişaf edəcəyi hələ də qeyri-müəyyən olaraq qalır.