Azərbaycan Respublikasının Prezidenti İlham Əliyev mayın 28-də Xankəndi şəhərində “GP Safety” MMC-nin iş əlcəkləri istehsalı müəssisəsinin açılışında iştirak edib.

Müəssisənin təsisçisi Hikmət Əsədov dövlət başçısına müəssisənin fəaliyyəti barədə məlumat verib.

Bildirilib ki, müəssisədə müxtəlif təyinatlı 4 növdə iş əlcəkləri istehsal olunacaq. İllik istehsal gücü 25 milyon cüt əlcək təşkil edən müəssisənin məhsulları ilkin mərhələdə daxili bazarın tələbatının ödənilməsinə yönəldiləcək. Gələcəkdə isə məhsulların Avropa bazarına ixracı nəzərdə tutulur.

Müəssisədə 35 nəfərin işlə təmin olunacağı qeyd edilib. Layihənin ümumi investisiya həcmi 3,5 milyon manat təşkil edir. Müəssisənin yaradılmasına dövlət dəstəyi göstərilib. Belə ki, Azərbaycan Biznesinin İnkişafı Fondu tərəfindən 1 milyon manat güzəştli kredit ayrılıb. Bundan əlavə, investisiya təşviqi sənədi əsasında idxal olunan avadanlıqlara görə 238 min manat məbləğində ƏDV güzəşti tətbiq olunub.

Qeyd olunub ki, müəssisənin fəaliyyətə başlaması Xankəndidə yüngül sənayenin inkişafına, yeni iş yerlərinin yaradılmasına və Qarabağın iqtisadi potensialının gücləndirilməsinə mühüm töhfə verəcək.