Bakının Binəqədi rayonunda, Bakı Beynəlxalq Avtovağzal Kompleksinin yaxınlığında sərnişin avtobusunda yanğın baş verib.
Qanuntv.az xəbər verir ki, hadisə 135 saylı marşrut xətti üzrə hərəkət edən sərnişin avtobusunda qeydə alınıb.
Daşıyıcı şirkətdən verilən məlumata görə, yanğının ilkin səbəbinin elektrik sistemində yaranmış yüklənmə olduğu ehtimal edilir.
Bildirilib ki, yay rejimi ilə əlaqədar iritutumlu nəqliyyat vasitəsinin elektrik sistemində həddindən artıq yüklənmə baş verə bilər və hadisənin də bunun nəticəsində meydana gəldiyi güman olunur.
Fövqəladə Hallar Nazirliyindən verilən məlumata əsasən, "112" qaynar telefon xəttinə Binəqədi rayonu, Bakı Beynəlxalq Avtovağzal Kompleksinin yaxınlığında avtobusda yanğın baş verməsi barədə məlumat daxil olub.
Dərhal hadisə yerinə FHN-in Dövlət Yanğından Mühafizə Xidmətinin qüvvələri cəlb edilib. Yanğınsöndürənlərin operativ müdaxiləsi nəticəsində alovun ətrafa yayılmasının qarşısı alınıb və yanğın söndürülüb.
Hadisə nəticəsində avtobusun yanar konstruksiyaları yanaraq yararsız vəziyyətə düşüb. Yaxınlıqdakı ağaclıq ərazi isə yanğından mühafizə olunub.
Hazırda faktla bağlı aidiyyəti qurumlar tərəfindən araşdırma aparılır. Yanğının dəqiq səbəbi ekspertiza rəyindən sonra məlum olacaq.
