Milli Məclisin deputatı Hikmət Babaoğlu Azərbaycan dilinin zənginləşdirilməsi və milli söz ehtiyatının gündəlik istifadəyə qaytarılması ilə bağlı maraqlı təkliflə çıxış edib.
Deputat hesab edir ki, Azərbaycan Milli Elmlər Akademiyasının Nəsimi adına Dilçilik İnstitutu dilimizə qaytarıla biləcək, eləcə də alınma sözləri əvəz edə biləcək sözlərlə bağlı yeni təkliflər hazırlamalıdır.
Hikmət Babaoğlu bu məsələyə nümunə olaraq yol-nəqliyyat nişanlarında istifadə edilən “Stop” sözünü göstərib. Onun fikrincə, həmin sözün əvəzinə Azərbaycan dilindəki “Dur” və ya “Toxta” ifadələrindən istifadə edilməsi müzakirəyə çıxarıla bilər.
Deputat açıqlamasında “Toxta” sözünün semantik xüsusiyyətlərinə xüsusi diqqət çəkib. O bildirib ki, bu söz yalnız dayanmağı deyil, həm də hərəkətə fasilə vermək və müəyyən müddətdən sonra yenidən davam etmək mənasını ifadə edən çalarları özündə birləşdirir.
Parlamentari vurğulayıb ki, dilimizin müxtəlif bölgələrində qorunub saxlanılan, lakin ədəbi dildə istifadəsi məhdudlaşan sözlər araşdırılmalı, onların siyahısı hazırlanmalıdır. Bu prosesdə AMEA ilə yanaşı, dilçilik sahəsində çalışan mütəxəssislərin də iştirakı vacibdir.
Hikmət Babaoğlunun fikrincə, alınma sözlərin hansı milli sözlərlə əvəz edilə biləcəyi müəyyənləşdirilməli və bu istiqamətdə alternativ lüğət hazırlanmalıdır. Həmin lüğət gələcəkdə hüquqşünaslar və qanunvericiliklə məşğul olan qurumlar üçün də əsas mənbələrdən birinə çevrilə bilər.
Deputat hesab edir ki, bu sözlərin dərsliklərə daxil edilməsi onların gələcək nəsillər tərəfindən mənimsənilməsinə və Azərbaycan dilinin leksik imkanlarının daha geniş şəkildə istifadəsinə töhfə verə bilər.
