İsveçin “Agenda Nexus” analitik portalı Avropanın enerji təminatında Azərbaycanın artan rolu ilə bağlı məqalə yayıb. Qanuntv.az xəbər verir ki, məlumatı Azərbaycanın Diasporla İş üzrə Dövlət Komitəsi yayıb.

Məqalədə qlobal enerji bazarlarında qeyri-sabitliyin artması və əsas təchizat marşrutlarında risklərin çoxalmasının Avropanı alternativ enerji mənbələri və yeni nəqliyyat yolları axtarmağa vadar etdiyi vurğulanıb. Bu şəraitdə Azərbaycan həm etibarlı enerji təchizatçısı, həm də mühüm tranzit qovşağı kimi rol oynayır.

Yazıda bildirilir ki, Prezident İlham Əliyevin rəhbərliyi ilə Azərbaycan balanslı xarici siyasət yürüdür, İsraillə strateji münasibətlərini gücləndirir və Avropa ilə ABŞ-la əməkdaşlığını ardıcıl şəkildə genişləndirir.

Məqalədə həmçinin Azərbaycanın Cənub Qaz Dəhlizi vasitəsilə Avropaya qaz ixracı, elektrik enerjisi, yaşıl enerji və hidrogen sahələrində infrastrukturun inkişaf etdirilməsi diqqətə çatdırılıb. Ölkənin əlverişli coğrafi mövqeyi və Xəzər dənizindəki zəngin enerji ehtiyatları uzun müddət etibarlı tərəfdaş olmasına imkan verəcək.

Portalda Zəngəzur dəhlizi layihəsinin regional ticarətin genişlənməsi, nəqliyyat və enerji sahələrində əlaqələrin gücləndirilməsi və qeyri-sabit marşrutlardan asılılığın azaldılması baxımından əhəmiyyəti də xüsusi qeyd olunub.