Dövlət İmtahan Mərkəzi (DİM) tərəfindən avqustun 9-da rezidenturaya qəbul imtahanının II mərhələsi keçirilib.

Qanuntv.az xəbər verir ki, DİM-in məlumatına əsasən, imtahan ilk dəfə elektron formada təşkil olunub. İmtahan Bakı şəhərində DİM-in elektron imtahanlar korpusunda və Naxçıvan şəhərində 4 nömrəli tam orta məktəbdə keçirilib.

Namizədlər imtahanı başa çatdırdıqdan və ya imtahan üçün ayrılmış vaxt tamamlandıqdan sonra nəticələri ilə tanış olmaq imkanı əldə ediblər. İmtahan nəticələrinin DİM-in rəsmi internet saytında da yerləşdiriləcəyi bildirilib.

İmtahanda iştirakı gözlənilən 996 namizəddən 5 nəfər imtahana gəlməyib.

İştirak edən namizədlərdən 827 nəfəri müsabiqə şərtini ödəyib. İxtisas fənləri üzrə 50 və daha yuxarı test balı toplayan namizədlər ixtisaslaşma seçiminə buraxılıblar.

İxtisas seçimi avqustun 12-dən başlayır

Rezidenturaya qəbul olmaq üçün ixtisas seçimi 12-16 avqust tarixlərində aparılacaq.

Müsabiqə şərtini ödəyən namizədlər həmin müddət ərzində elektron ərizələrinə daxil olaraq baza ali tibb təhsili üzrə uyğun ixtisasları seçməli və təsdiqləməlidirlər.

Namizədlər bitirdikləri fakültəyə uyğun ixtisasları “Rezidentura” jurnalının 3-cü nömrəsində dərc edilmiş “Rezidenturaya qəbul aparılan ixtisaslar” bölməsindən müəyyən edə bilərlər.

Apellyasiya üçün müraciət imkanı

İmtahan nəticələri ilə bağlı Apellyasiya Komissiyasına müraciət etmək istəyən şəxslər 11-12 avqust tarixlərində saat 10:00-dan 17:00-dək şəxsiyyət vəsiqəsi ilə DİM-in əsas inzibati binasına və ya regional bölmələrə müraciət edərək ərizə yaza bilərlər.

DİM-in əsas inzibati binası Bakı şəhəri, akademik Həsən Əliyev küçəsi, 299 ünvanında yerləşir.

Qanuntv.az olaraq rezidenturaya qəbul prosesi ilə bağlı yenilikləri diqqətdə saxlayacağıq.