Daxili İşlər Nazirliyi (DİN) vətəndaşları onlayn alış-veriş zamanı kiberdələduzluq hallarına qarşı diqqətli olmağa çağırıb.
Qanuntv.az xəbər verir ki, nazirliyin yaydığı məlumatda mütəmadi maarifləndirmə tədbirlərinə və çoxsaylı xəbərdarlıqlara baxmayaraq, internet üzərindən alış-veriş zamanı vətəndaşların kiberdələduzluqla üzləşməsi hallarının hələ də müşahidə olunduğu bildirilib.
Qeyd olunub ki, kiberdələduzlar saxta satış səhifələri yaradaraq müxtəlif məhsulları cəlbedici qiymətlərlə təklif edirlər. Ödəniş alındıqdan sonra isə vətəndaşla əlaqəni kəsir, telefon nömrələrini və sosial şəbəkə hesablarını bloklayırlar.
DİN bu kimi halların qarşısını almaq üçün vətəndaşlara internet və sosial şəbəkələrdə rastlaşdıqları satış səhifələrinin etibarlılığını əvvəlcədən yoxlamağı, tanımadıqları və etibar etmədikləri şəxslərdən məhsul sifariş etməməyi tövsiyə edib.
Xüsusilə əvvəlcədən ödəniş tələb edən təkliflərə qarşı diqqətli olmaq və ödəniş etməzdən əvvəl satıcı barədə məlumatları, əlaqə vasitələrini və təqdim olunan səhifənin həqiqiliyini yoxlamaq tövsiyə olunur.
Nazirlik vətəndaşlara etibar etmədikləri və ya həqiqiliyinə əmin olmadıqları səhifə və saytlara ödəniş etməməyi, bank kartlarının məlumatlarını, CVV/CVC kodlarını, SMS vasitəsilə göndərilən təsdiq kodlarını və digər məxfi məlumatları üçüncü şəxslərlə paylaşmamağı xatırladıb.
DİN kiberdələduzluqla üzləşən şəxsləri dərhal “102” xidmət-zəng mərkəzinə və ya nazirliyin rəsmi sosial şəbəkə hesablarına müraciət etməyə çağırıb.
