Baş Prokurorluq yanında Korrupsiyaya Qarşı Mübarizə Baş İdarəsinin Dövlət Gömrük Komitəsində apardığı araşdırmalar çərçivəsində daha iki gömrük əməkdaşının Azərbaycana gətirildiyi məlum olub.

Məlumata görə, Hövsan Dəniz Gömrük Postunda külli miqdarda qanunsuz siqaret yüklərinin aşkarlanması ilə bağlı başlanan cinayət işi üzrə axtarışa verilən Dəniz Nəqliyyatı və Enerji Resursları Baş Gömrük İdarəsinin Əməliyyat və təhqiqat idarəsinin Əməliyyat şöbəsinin baş əməliyyat müvəkkili, gömrük xidməti mayoru Ənvər Tağıyev və Bakı-Hövsan Beynəlxalq Ticarət Dəniz Limanı gömrük postunun inspektoru, gömrük xidməti mayoru Tahir Tahiri ölkədən qaçaraq əvvəlcə İrana, daha sonra Ukraynaya getmişdilər.

Hər iki şəxs Ukrayna ərazisində saxlanılaraq Azərbaycana ekstradisiya olunub.

Əldə olunan məlumata əsasən, ölkədən qaçmalarından altı ay keçməsinə baxmayaraq, adıçəkilən gömrük əməkdaşları yalnız 2026-cı il mayın 26-da Dövlət Gömrük Komitəsinin sədri Şahin Bağırovun müvafiq əmri ilə tutduqları vəzifələrdən azad ediliblər.

Xatırladaq ki, Hövsan Dəniz Gömrük Postunda aşkarlanan qanunsuz siqaret yükləri ilə bağlı cinayət işi çərçivəsində Dəniz Nəqliyyatı və Enerji Resursları Baş Gömrük İdarəsinin Hövsan Məntəqəsinin rəisi Fərid Usubov, Bakı-Hövsan Beynəlxalq Ticarət Dəniz Limanının rəisi Rəşad Daşdəmirov, eləcə də idarənin əməkdaşları Heydər Eyvazov və Tamerlan Axundzadə həbs ediliblər.

Məlumata görə, Fərid Usubov uzun illər Xüsusi Dövlət Mühafizə Xidməti rəisinin müavini vəzifəsində çalışmış general-leytenant Cəbrayıl Usubovun oğludur.

Fərid Usubova qarşı qaçaqmalçılıq, aksiz markası ilə markalanmalı olan malların qanunsuz dövriyyəsi və vəzifə səlahiyyətlərindən sui-istifadə maddələri ilə ittiham irəli sürülüb.

Faktla bağlı araşdırmalar davam etdirilir.