Naxçıvan Ali Məhkəməsində 1986-cı il təvəllüdlü Aypara Əsgərova və 1987-ci il təvəllüdlü Firuzə Seyidovanın apellyasiya şikayəti üzrə məhkəmə prosesi davam edir.

Qanuntv.az xəbər verir ki, Musavat.com-un yaydığı məlumata əsasən, təqsirləndirilən şəxslər Naxçıvan Ağır Cinayətlər Məhkəməsinin hökmündən narazı qalaraq qərardan apellyasiya şikayəti veriblər.

Birinci instansiya məhkəməsində hakim Hüseyn Məmmədovun sədrliyi ilə baxılan cinayət işi üzrə Aypara Əsgərova və Firuzə Seyidova tamah məqsədilə, qabaqcadan əlbir olan bir qrup şəxs tərəfindən xüsusi amansızlıqla qəsdən adam öldürməkdə təqsirli biliniblər.

Məhkəmənin hökmünə əsasən, Aypara Əsgərova 14 il 6 ay, Firuzə Seyidova isə 15 il müddətinə azadlıqdan məhrum edilib. Bildirilir ki, hər iki məhkumun üç övladı var.

İttihama görə, hadisə ötən ilin 19 aprel tarixində Şərur rayonunun Oğlanqala kəndində baş verib. Kənddə tək yaşayan 75 yaşlı Zeynəb İsmayılovanın imkanlı şəxs kimi tanındığı, insanlara borc verməsi və evində nağd pul saxlamasının təqsirləndirilən şəxslərin diqqətini cəlb etdiyi qeyd olunur.

İstintaq materiallarında göstərilir ki, maddi çətinliklər yaşayan Aypara Əsgərova Zeynəb İsmayılovanın pul vəsaitini ələ keçirmək məqsədilə plan hazırlayıb və bu barədə Firuzə Seyidova ilə razılığa gəlib.

Hadisə günü Zeynəb İsmayılova Aypara Əsgərovanın evinə gələrək paltarlarını yumaq üçün paltaryuyan maşından istifadə edib. İttihama əsasən, qadın paltarları götürmək üçün əyildiyi zaman ona arxadan çəkic və dəmir linglə çoxsaylı zərbələr endirilib. Daha sonra zərərçəkmişin boğularaq öldürüldüyü bildirilir.

Cinayətin izlərini gizlətmək məqsədilə meyit adyala bükülərək həyətdə yerləşən su quyusuna atılıb. İstintaq materiallarına görə, təqsirləndirilən şəxslər mərhuma məxsus pul və qızıl-zinət əşyalarını götürərək hadisəni gizlətməyə çalışıblar.

Qətlin üstünün Aypara Əsgərovanın qısa müddət ərzində borclarını ödəməsinin diqqət çəkməsi nəticəsində açıldığı bildirilir. Aparılan axtarış tədbirləri zamanı xidməti itin reaksiyası hüquq-mühafizə orqanlarını həmin ünvana istiqamətləndirib. Fövqəladə Hallar Nazirliyinin əməkdaşlarının iştirakı ilə quyudan çıxarılan meyitin Zeynəb İsmayılovaya aid olduğu müəyyən edilib.

Məhkəmə-tibbi ekspertizasının rəyinə əsasən, mərhumun kəllə sümüyündə çoxsaylı qəlpəli sınıqlar aşkarlanıb və həmin xəsarətlərin hər birinin həyati təhlükə yaratdığı qeyd olunub.

İstintaq zamanı Aypara Əsgərova cinayəti törətdiyini etiraf edərək, məqsədinin əldə etdiyi pulla Türkiyəyə getmək olduğunu bildirib.

Hazırda iş üzrə Naxçıvan Ali Məhkəməsində apellyasiya baxışı davam edir.