Sumqayıt Ağır Cinayətlər Məhkəməsinin hakimi Aynur Rzayevanın həyatını itirdiyi ağır yol-nəqliyyat hadisəsi ilə bağlı məhkəmə prosesi yekunlaşıb.
Məhkəmənin hökmünə əsasən, qəza ilə bağlı təqsirləndirilən Nuran Abdurahmanov 5 il 2 ay müddətinə azadlıqdan məhrum edilib.
Məhkəmə araşdırmaları zamanı mərhum hakimin anası təqsirləndirilən şəxsi bağışlamadığını bildirib. O qeyd edib ki, Aynur Rzayeva ağır kateqoriyalı cinayət işlərinə baxan hakim olub və hadisənin onun peşə fəaliyyəti ilə əlaqəsinin olub-olmaması istiqamətində araşdırma aparılmadığını iddia edib.
Hüquqi varis təqsirləndirilən şəxsdən ümumilikdə 1 milyon manat təzminat tələb edib. Tələbə qəzada yararsız hala düşmüş avtomobilə görə 30 min manat, mərhumun azyaşlı övladlarının təminatı üçün 700 min manat, mənəvi zərərə görə isə 270 min manat daxil edilib.
Lakin məhkəmə 700 min manat məbləğində maddi ziyanın ödənilməsi ilə bağlı tələbi təmin etməyib. Qərarda bildirilib ki, qanunvericiliyə əsasən, bu cür hallarda təminat hüququ birbaşa mərhumun himayəsində olan şəxslərə məxsusdur və onların hüquqları qanuni nümayəndələri tərəfindən müdafiə olunur.
Mənəvi zərərlə bağlı iddia da qismən təmin edilib. Məhkəmə cavabdehin maddi vəziyyətini və digər halları nəzərə alaraq, tələb olunan 270 min manat əvəzinə 20 min manat mənəvi təzminat ödənilməsinə qərar verib.
Bundan əlavə, qəzada yararsız vəziyyətə düşmüş "Nissan Sunny" markalı avtomobilə görə 1 701 manat məbləğində kompensasiyanın ödənilməsi qərara alınıb. Beləliklə, təqsirləndirilən şəxs zərərçəkən tərəfə ümumilikdə 21 701 manat ödəyəcək.
Qeyd edək ki, qəza ötən ilin dekabrında Sumqayıt–Pirşağı avtomobil yolunda baş verib. Nuran Abdurahmanovun idarə etdiyi "Samand Soren" markalı avtomobil "Nissan Sunny" ilə toqquşub. Hadisə nəticəsində avtomobildə sərnişin qismində olan Sumqayıt Ağır Cinayətlər Məhkəməsinin hakimi Aynur Rzayeva həlak olub, sürücü isə ağır xəsarətlər alıb.
Məhkəmə prosesində təqsirləndirilən şəxs əməlindən peşman olduğunu, zərərçəkmiş tərəfdən üzr istədiyini, himayəsində iki övladı, övladlığa götürdüyü bir uşaq və yaşlı valideynlərinin olduğunu bildirərək məhkəmədən ona yüngül cəza verilməsini xahiş edib.
Xatırladaq ki, Aynur Rzayeva Vətən uğrunda şəhid olmuş Tapdıq Rzayevin qızıdır.
