Abşeron rayonunun Xırdalan şəhərində baş verən bıçaqlanma hadisəsi ailə faciəsi ilə nəticələnib.

Qanuntv.az xəbər verir ki, ilkin məlumata görə, Zaqatala rayon sakini Tərlan İbrahimov yaşadığı evdə həyat yoldaşını bıçaqlayıb, daha sonra isə özünə xəsarət yetirib.

Hadisə nəticəsində qadın ağır yaralı vəziyyətdə xəstəxanaya çatdırılıb. Kişinin isə hadisə yerində öldüyü müəyyən edilib.

TƏBİB-in məlumatına görə, çağırış iyulun 3-də saat 07:50-də Respublika Təcili və Təxirəsalınmaz Tibbi Yardım Mərkəzinə daxil olub. Hadisə yerinə təcili tibbi yardım briqadası göndərilib və bir nəfərin ölüm faktı qeydə alınıb.

Xəsarət alan qadın Abşeron Rayon Mərkəzi Xəstəxanasına hospitalizasiya edilib. Ona boyun, baş, döş qəfəsi, said, çiyin və bazu nahiyələrinin çoxsaylı açıq yaraları, eləcə də qarın divarının kontuziyası diaqnozları qoyulub.

Həkimlərin bildirdiyinə görə, pasiyentin vəziyyəti orta ağır qiymətləndirilir. Müvafiq müayinələrdən sonra o, cərrahi əməliyyata alınıb.

Faktla bağlı Abşeron Rayon Prokurorluğunda Cinayət Məcəlləsinin müvafiq maddələri ilə cinayət işi başlanıb, araşdırma aparılır.