“Qalatasaray”la yollarını ayıran argentinalı ulduz hücumçu Mauro İkardi klubdan ayrılığının ardından atdığı addımla gündəmə gəlib.

Qanuntv.az xəbər verir ki, “Sabah” nəşrinin məlumatına görə, 33 yaşlı forvard klub prezidenti Dursun Özbəyin onun şərəfinə təşkil etmək istədiyi vida mərasimində iştirakdan imtina edib.

Məlumata əsasən, “Qalatasaray” rəhbərliyi “Vilyarreal”la keçiriləcək yoldaşlıq görüşündən əvvəl İkardi üçün xüsusi vida mərasimi təşkil etməyi planlaşdırıb. Lakin bununla bağlı futbolçuya göndərilən rəsmi dəvətin İkardi tərəfindən qəbul edilmədiyi bildirilir.

İddialara görə, argentinalı hücumçunun bu qərarının arxasında klub daxilində yaranmış bəzi narazılıqlar dayanır. Bildirilir ki, ayrılıq ərəfəsində baş verən müəyyən hadisələr İkardinin həm klub rəhbərliyindən, həm də baş məşqçi Okan Burukdan inciməsinə səbəb olub.

Bu səbəbdən futbolçunun “Vilyarreal”la matçdan əvvəl keçirilməsi nəzərdə tutulan vida mərasimində iştirak etməkdən imtina etdiyi qeyd olunur.

“Qalatasaray”da iz qoydu

Mauro İkardi “Qalatasaray”da keçirdiyi dörd mövsüm ərzində klubun əsas simalarından birinə çevrilib və komandanın kapitanı olub.

Argentinalı futbolçu İstanbul təmsilçisinin heyətində keçirdiyi 134 rəsmi oyunda 77 qol vurub və 25 məhsuldar ötürmə edib.

İkardinin “sarı-qırmızılı” formada göstərdiyi məhsuldar çıxış onun klub azarkeşlərinin yaddaşında xüsusi yer tutmasına səbəb olub.