ABŞ ilə İran arasında atəşkəs razılaşmasının yaxın zamanda əldə olunması mümkündür.
Qanuntv.az xəbər verir ki, ABŞ-nin maliyyə naziri Skott Bessent “12 News”a müsahibəsində Vaşinqtonun atəşkəs razılaşmasını çox qısa müddətdə, hətta bu gün əldə edə biləcəyini bildirib.
Bessent ABŞ Prezidenti Donald Trampın ABŞ və İsrailin həyata keçirdiyi əməliyyatlar nəticəsində İranın aviasiyası və donanmasının “məhv edildiyi” barədə açıqlamalarını təkrarlayıb.
ABŞ Maliyyə Nazirliyinin rəhbəri həmçinin İranın iqtisadi baxımdan ciddi zərbə aldığını iddia edib.
“Biz onların boğazından yapışmışıq. Onlarda ərzaq inflyasiyası 150-180 faizdir, qoşunlarını saxlaya bilmirlər”, – deyə Bessent bildirib.
O, bununla əlaqədar ABŞ və İran arasında mümkün atəşkəs razılaşmasının bu gün və ya sabah imzalana biləcəyini istisna etməyib.
Nazirin sözlərinə görə, mümkün atəşkəsin müddəti 30 və ya 60 gün ola bilər.
Xatırladaq ki, iyun ayında əldə olunan anlaşma memorandumu 60 günlük atəşkəsi nəzərdə tuturdu. Həmin müddət ərzində ABŞ və İran arasında sülh sazişinin əsas parametrlərinin yekunlaşdırılması planlaşdırılırdı.
Lakin iyulun əvvəlində tərəflər arasında döyüş əməliyyatları yenidən başlayıb və ayın sonunadək davam edib.
Həmin dövrdə ABŞ Prezidenti Donald Tramp İranın energetika sisteminə zərbələrin təxirə salındığını və tərəflər arasında danışıqların bərpa olunduğunu açıqlayıb.
Hazırda mümkün yeni atəşkəs razılaşmasının şərtləri və müddəti ilə bağlı tərəflərdən rəsmi açıqlamalar gözlənilir.
