Avqustun 11-də Azərbaycan Respublikasının Prezidenti İlham Əliyev və birinci xanım Mehriban Əliyeva Naxçıvan şəhərində inşa edilən, ümumi gücü 50 MVt olan “Şəms 1” və “Qərbi Üfüq” Günəş Elektrik stansiyalarında görülən işlərlə tanış olublar.
Qanuntv.az xəbər verir ki, energetika naziri Pərviz Şahbazov layihələrlə bağlı dövlət başçısına və birinci xanıma məlumat verib.
Bildirilib ki, gücü 25 MVt olan “Şəms 1” layihəsi bərpaolunan enerji mənbələri ərazisi kimi müəyyən edilmiş 52 hektar sahədə həyata keçirilir. “CEİ Naxçıvan” MMC tərəfindən artıq 10 MVt gücündə günəş panellərinin quraşdırılması başa çatdırılıb. Tikinti-quraşdırma işlərinin cari ilin noyabrında yekunlaşdırılması planlaşdırılır.
Şəbəkə infrastrukturunun inşası başa çatdıqdan sonra stansiyanın istismara verilməsi nəzərdə tutulur. Hazırda layihənin icrasında 218 nəfər çalışır.
Stansiyanın fəaliyyətə başlamasından sonra ildə təxminən 57 milyon kilovat-saat elektrik enerjisi istehsal ediləcəyi və 19 minə yaxın ev təsərrüfatının enerji ilə təmin olunacağı gözlənilir. Bununla yanaşı, hər il təxminən 26 min ton karbon qazı emissiyasının qarşısının alınacağı və 12 milyon kubmetr təbii qaza qənaət ediləcəyi proqnozlaşdırılır.
Prezident İlham Əliyevə və birinci xanım Mehriban Əliyevaya “CEİ Naxçıvan” MMC-nin daxil olduğu AGEC şirkətlər qrupunun Azərbaycanda həyata keçirdiyi digər layihələr barədə də məlumat verilib.
Dövlət başçısı və birinci xanım daha sonra gücü 25 MVt olan “Qərbi Üfüq” Günəş Elektrik Stansiyasında görülən işlərlə tanış olublar.
Məlumata görə, “Enerso” MMC tərəfindən stansiyanın inşası ilə bağlı topoqrafik işlər artıq başa çatdırılıb, geoloji tədqiqatlar isə davam etdirilir. Cari ilin sonunadək tikinti işlərinə başlanılması planlaşdırılır.
Layihənin bərpaolunan enerji mənbələri ərazisi kimi müəyyən edilmiş 50 hektar sahədə həyata keçirilməsi nəzərdə tutulur. Stansiyanın istismara verilməsindən sonra ildə təxminən 61 milyon kilovat-saat elektrik enerjisi istehsal ediləcəyi və 21 minə yaxın ev təsərrüfatının enerji ilə təmin olunacağı bildirilir.
Bundan başqa, stansiyanın fəaliyyəti nəticəsində ildə təxminən 26 min ton karbon qazı emissiyasının qarşısının alınacağı və 12 milyon kubmetr təbii qaza qənaət ediləcəyi gözlənilir.
Ümumilikdə, Naxçıvanda 688 hektar ərazi Günəş elektrik stansiyalarının tikintisi məqsədilə bərpaolunan enerji mənbələri ərazisi kimi müəyyən edilib.
Hazırda Azərbaycanda bərpaolunan enerji mənbələri üzrə qoyuluş gücü 2070 MVt təşkil edir. Bunun 108 MVt-ı, yəni 5,2 faizi Naxçıvanın payına düşür.
“Şəms 1” və “Qərbi Üfüq” Günəş Elektrik stansiyalarının istifadəyə verilməsi ilə Naxçıvanın bərpaolunan enerji üzrə qoyuluş gücünün 158 MVt-a çatdırılması nəzərdə tutulur.
