ABŞ İmmiqrasiya və Gömrük Mühafizəsi (ICE) tanınmış Azərbaycan neyrobioloqu Şövqi Hüseynovu həbs edib və deportasiya etməyə hazırlaşır. Bu barədə Haqqın.az “The Investigative Post” nəşrinə istinadla məlumat yayıb.
Məlumata görə, Ş. Hüseynov 2029-cu ilə qədər ABŞ-da işləmək hüququ verən vizaya malik olmasına baxmayaraq, 7 yanvarda səhvən Kanadaya keçdikdən sonra geri qayıtdıqda ABŞ sərhəd rəsmiləri tərəfindən saxlanılıb. Həbsin konkret səbəbi açıqlanmayıb. Hazırda alimin Batavia Təcridxanasında saxlandığı bildirilir.
Buffalo Universitetinin sözçüsü Con Della Kontradanın açıqlamasına görə, Ş. Hüseynov 2022-ci ildən Ceykobs Tibb və Biotibbi Elmlər Məktəbində tədqiqatçı kimi çalışır və onun hüquqi statusu hələ baxılmaqdadır. ICE isə onun ölkədə hüquqi statusunun olmadığını və deportasiyasını tələb etdiyini bildirir.
Ş. Hüseynov opioid asılılığı olan siçanlar üzərində neyrobioloji tədqiqatlar apararaq beyin və immun sisteminin qarşılıqlı təsirini öyrənib. O, Azərbaycan Milli Elmlər Akademiyasının Abdulla Qarayev adına Fiziologiya İnstitutunun əməkdaşı olub və 2022-ci ildə ABŞ-a tədqiqat aparmaq üçün səfər edib.
Qeyd edək ki, Şövqi Hüseynov tanınmış akademik və fizika-riyaziyyat doktoru mərhum Hatəm Quliyevin qardaşı oğludur.