Bakı Ağır Cinayətlər Məhkəməsində fəhlə yoldaşını qətlə yetirərək meyiti hissələrə ayırmaqda təqsirləndirilən Fazil Feyzullayev və ona kömək etməkdə ittiham olunan Ülvi Abbasovun cinayət işi üzrə məhkəmə prosesi davam etdirilib.
Qanuntv.az xəbər verir ki, hakim Elmin Rüstəmovun sədrliyi ilə keçirilən prosesdə şahid Babək Güləliyev ifadə verib.
Şahid bildirib ki, hadisədən təxminən dörd ay sonra təqsirləndirilən şəxslə qarşılaşıb:
“Yolda sürət həddini aşdığı üçün sürücüyə sayrışan işıqlarla işarə verdim. Avtomobili saxladıqdan sonra ona yaxınlaşıb yol hərəkəti qaydalarını kobud şəkildə pozduğunu bildirdim. O isə avtomobildə zibil olduğunu və onu atmağa tələsdiyini deyərək üzr istədi”.
Məhkəmənin növbəti iclası mayın 19-na təyin olunub.
Qeyd edək ki, hadisə ötən ilin avqust ayında Nəsimi rayonu ərazisində baş verib. İttihama görə, 1977-ci il təvəllüdlü Fazil Feyzullayev kirayədə yaşadığı evdə fəhlə yoldaşı, Tərtər rayonu sakini, 1991-ci il təvəllüdlü İsgəndər Əliyevi küt alətlə qətlə yetirib.
Daha sonra meyit avtomobillə Ağsu dolaylarına aparılıb, hissələrə ayrılıb və müxtəlif ərazilərə atılıb. Meyitin bəzi hissələrinin dərəyə, digər hissələrinin isə rayon ərazisində yerləşən Cavanşir gölünə atıldığı bildirilir.
Polisin keçirdiyi əməliyyat-axtarış tədbirləri nəticəsində hadisənin üstü açılıb, Fazil Feyzullayev və Ülvi Abbasov saxlanılıblar.
Təqsirləndirilən şəxslərə qarşı Azərbaycan Respublikası Cinayət Məcəlləsinin bir neçə ağır maddəsi, o cümlədən adam öldürmə, quldurluq və meyit üzərində təhqiredici hərəkətlər maddələri ilə ittiham irəli sürülüb.
