Bakının Sabunçu rayonunda ağır qətl hadisəsi baş verib.

Hadisə rayonun Ramana qəsəbəsi ərazisində, Südçülük sovxozunda qeydə alınıb.

Məlumata görə, 60 yaşlı Adıgözəl Məmmədov liftin qarşısında 31 yaşlı gəlini Gülüzar Məmmədova ilə qarşılaşıb. Onların arasında yaranan mübahisə zamanı qadına xəsarətlər yetirilib və o, liftin içərisində həyatını itirib. Hadisədən sonra şübhəli şəxs ərazidən uzaqlaşıb.

Hüquq-mühafizə orqanlarının keçirdiyi əməliyyat-axtarış tədbirləri nəticəsində Adıgözəl Məmmədov saxlanılaraq istintaqa təhvil verilib.

Qonşuların sözlərinə görə, ailə üzvləri birlikdə yaşamırdı. Gülüzar Məmmədova övladları ilə ayrı yaşayır, qayınanası isə ona dəstək olmaq üçün yanında qalırdı. Qayınata isə başqa ünvanda yaşayırdı.

Hadisə yerinə cəlb olunan polis əməkdaşları ərazidə araşdırmalar aparıblar. Faktla bağlı Sabunçu Rayon Prokurorluğu tərəfindən Azərbaycan Respublikası Cinayət Məcəlləsinin müvafiq maddəsi ilə cinayət işi başlanılıb.

Hazırda hadisənin bütün təfərrüatları araşdırılır.