Tailandın Banqkok şəhərinin şimalında yerləşən Nontaburi əyalətindəki məktəblərdən birində baş verən silahlı hücum ölkədə böyük faciəyə səbəb olub.
Qanuntv.az xəbər verir ki, "Reuters" agentliyinin Tailand polisinə istinadən yaydığı məlumata görə, silahlı hücumu törədən şagird məktəbə gəlməzdən əvvəl öz evində nənəsi və babasını da güllələyərək qətlə yetirib.
İstintaqın ilkin nəticələrinə əsasən, hücum edən şəxs məktəb ərazisində ümumilikdə 26 dəfə atəş açıb. Hadisənin baş verdiyi təhsil müəssisəsində 147 müəllim çalışır və burada 3 mindən çox şagird təhsil alır.
Son məlumata görə, faciə nəticəsində 7 nəfər həyatını itirib. Ölənlər arasında üç müəllim, üç şagird və hücumdan sonra intihar edən cinayətkar var. Hadisə zamanı daha 15 nəfər müxtəlif dərəcəli bədən xəsarətləri alaraq xəstəxanaya yerləşdirilib. Yaralılardan ikisinin vəziyyətinin ağır olduğu bildirilir.
Xatırladaq ki, hadisə ilə bağlı yayılan ilk məlumatlarda iki müəllimin öldüyü, 20-dən çox şəxsin yaralandığı qeyd edilirdi. Sonradan hüquq-mühafizə orqanlarının apardığı araşdırmalar nəticəsində ölən və yaralananların sayı dəqiqləşdirilib.
Hazırda polis əməkdaşları hadisənin bütün təfərrüatlarını araşdırır. Təcili yardım və təhlükəsizlik qüvvələri məktəb ərazisində fəaliyyətini davam etdirir. Yerli hakimiyyət orqanları vətəndaşlara hadisə yerinə yaxınlaşmamaq barədə xəbərdarlıq edib.
Silahlı hücumun motivi hələlik rəsmi şəkildə açıqlanmayıb.
