Rusiyanın Ukraynanın paytaxtı Kiyevə endirdiyi raket və pilotsuz uçuş aparatları ilə hücum nəticəsində həlak olanların sayı 17 nəfərə yüksəlib.

Qanuntv.az xəbər verir ki, bu barədə Ukrayna Prezidenti Volodimir Zelenski "Telegram" kanalında məlumat yayıb.

Prezident bildirib ki, hücum nəticəsində daha 44 nəfər müxtəlif dərəcəli bədən xəsarətləri alıb.

Zelenskinin sözlərinə görə, Rusiya hücum zamanı 24 ballistik raket, 4 "Sirkon/Oniks" raketi və əksəriyyəti reaktiv tipli olmaqla 115 pilotsuz uçuş aparatından istifadə edib. O qeyd edib ki, əsas hədəflər mülki müəssisələrin anbarları, infrastruktur obyektləri və dəmiryol stansiyası olub.

"Hədəflər arasında pivə zavodu, tikinti materialları anbarları və mülki logistika obyektləri də var idi. Bunların müharibə ilə heç bir əlaqəsi yoxdur", – deyə Zelenski bildirib.

Ukrayna Dövlət Fövqəladə Hallar Xidmətinin məlumatına görə, Brovarı rayonunda, eləcə də Böyük Dımerka qəsəbəsi, Kvitneve və Pobeda kəndlərində anbarlarda güclü yanğınlar baş verib. Fastov rayonunda müəssisələrdən birində nəqliyyat vasitələrində yaranan yanğın söndürülüb, Buça rayonunun Çayki kəndində və Sofiyevskaya Borşaqovkada logistika mərkəzində baş vermiş yanğınların qarşısının alınması istiqamətində tədbirlər görülüb.

Bundan başqa, Obolon, Svyatoşin, Qoloseyev və Desnyan rayonları da hücumlara məruz qalıb. Sənaye müəssisələrindən birində kiçik həcmdə ammonyak sızması qeydə alınsa da, xilasedicilər qısa müddətdə sızmanın qarşısını alıblar və əhali üçün təhlükənin olmadığı bildirilib.