Qəbələdə Azərbaycan Prezidenti İlham Əliyev və Ukrayna Prezidenti Volodimir Zelenski arasında keçirilən görüşdən sonra liderlər mətbuata mühüm bəyanatlarla çıxış ediblər. Görüş zamanı təhlükəsizlik, enerji, müdafiə sənayesi və regional əməkdaşlıq məsələləri əsas müzakirə mövzuları olub.
Qanuntv.az xəbər verir ki, Volodimir Zelenski bildirib ki, Ukrayna Rusiya ilə növbəti danışıqların Azərbaycanda keçirilməsinə hazırdır.
Ukrayna prezidenti qeyd edib ki, rəsmi Kiyev artıq Azərbaycan Prezidentinə bu barədə məlumat verib və üçtərəfli danışıqlar formatının bərpasını dəstəkləyir.
“Biz Türkiyədə və İsveçrədə bu cür görüşlər keçirmişik. Rusiya diplomatiyaya hazır olarsa, yaxın zamanda belə danışıqların Azərbaycanda keçirilməsinə də hazırıq”, – deyə Zelenski vurğulayıb.
Zelenski çıxışında Azərbaycanla təhlükəsizlik sahəsində çox dərin əməkdaşlıq qurmağın mümkün olduğunu da bildirib. Onun sözlərinə görə, bu, yalnız silah məsələsi deyil, dövlətlərin sabitliyi, təhlükəsizliyi və gələcək təhdidlərə qarşı hazırlığı baxımından strateji əhəmiyyət daşıyır.
Ukrayna lideri müdafiə sənayesi və təhlükəsizlik sahəsində artıq mühüm addımlar atıldığını, hətta bu istiqamətdə müəyyən sənədlərin də imzalandığını diqqətə çatdırıb. O bildirib ki, ölkələr güclü müdafiə potensialına sahib olmalıdır ki, heç bir tərəf onlara qarşı aqressiya barədə düşünməsin.
Volodimir Zelenski, həmçinin Azərbaycanın Ukraynaya göstərdiyi humanitar və siyasi dəstəyə görə Prezident İlham Əliyevə təşəkkür edib. O, xüsusilə enerji avadanlıqları, humanitar yardım və ukraynalı uşaqlara göstərilən diqqəti yüksək qiymətləndirib.
Prezident İlham Əliyev isə bəyanatında Azərbaycan və Ukraynanın qarşılıqlı olaraq bir-birinin ərazi bütövlüyünü dəstəklədiyini vurğulayıb. O qeyd edib ki, iki ölkə arasında enerji, ticarət, nəqliyyat və investisiya sahələrində əməkdaşlığın genişləndirilməsi üçün ciddi perspektivlər mövcuddur.
Dövlət başçısı bildirib ki, SOCAR uzun illərdir Ukraynada uğurla fəaliyyət göstərir və yeni birgə layihələr üzərində iş aparılır. Əliyev əlavə edib ki, bu görüş strateji tərəfdaşlığın daha da möhkəmlənməsinə xidmət edir.
Qəbələdə baş tutan bu yüksək səviyyəli görüş həm regional diplomatiya, həm də Azərbaycan-Ukrayna münasibətlərinin yeni mərhələsi baxımından xüsusi əhəmiyyət daşıyır. Zelenskinin “danışıqlar Azərbaycanda keçirilə bilər” mesajı isə beynəlxalq siyasi gündəmin əsas mövzularından birinə çevrilib.
